Kentaý qalasynda Ekinshi dúnıejúzilik soǵysqa qatysqan jalǵyz ardager turady

TÚRKІSTAN. KAZINFORM –  Surapyl soǵysty bastan ótkerip, jeńiske kýá bolǵan ardagerlerdiń sany jyl saıyn azaıyp barady. Máselen Túrkistan oblysyndaǵy Kentaý qalasynda Ekinshi dúnıejúzilik soǵysqa qatysqan jalǵyz qart qalǵan. Bul týraly Jibek Joly telearnasynyń jańalyqtarynda aıtyldy. 

 Ol - Badan Tórebaev. Ardager 18 jasynda soǵysqa attanyp, Ýkraına, Belarýs maıdandaryna qatysqan. Badan Tórebaev 1944 jyly 15 qazanda áskerge shaqyrylǵan. 4 aı daıyndyqtan ótip, Oderden ótýdegi urysqa, Potsdamdy azat etýge, Berlındi qorshaýǵa qatysady. 1950 jyly elge oralǵannan keıin Kentaý qalasyndaǵy «Myrǵalymsaı» kenishinde kóp jyl boıy jemisti jumys istegen. Eki ul, úsh qyz tárbıelep, ósirdi. Olardan 16 nemere, 42 shóbere, 3 shópshek súıip otyr. Qazir ardagerdi úlken kelini qarap, jaǵdaıyn jasap otyr.

— Ardagerler úıi bar, sol jerden atanyń jaǵdaıyn bilip, kelip turady. Aýylda ósken ǵoı, atamyz áli tyń, jaǵdaıy jaqsy. Tamaǵyn ýaqytyly ishedi. Atamyz aman bolsyn dep, jaǵdaıyn jasap, qarap otyrmyz, — dedi atanyń kelini Aıjan Tórebaeva.

Eńbegi elengen aqsaqal «Qurmet belgisi» ordenimen marapattalǵan. Qarııa jeńistiń ońaı jolmen kelmegenin jetkizdi. Búginde Túrkistan oblysynda 9 soǵys ardageri turady. Jeńistiń 80 jyldyq merekesine oraı ardagerlerge 5 mln teńge birjolǵy áleýmettik kómek kórsetý kózdelgen.

— 3 047 tyl eńbekkerine jáne soǵys ardagerleriniń jesirlerine 50-den 100 myń teńgege deıin birrettik áleýmettik kómek beriledi. Bul maqsatqa jergilikti bıýdjet esebinen 222 mln teńgeden asa qarjy qaraldy, — dedi oblystyq Jumyspen qamtýdy úılestirý jáne áleýmettik baǵdarlamalar basqarmasynyń bas mamany Mahabbat Mamytjanova.

Óńirdiń abyz aqsaqaly beıbit kúnniń qadirin bilýge shaqyrady. «Endigi urpaq osy azattyqty qorǵaý jolynda kúressin» deıdi. Ardagerdiń bar muraty osy.