Kentaý ekologııalyq apat aımaǵy atandy: turǵyndar jalaqysyna 20% qosylady

TÚRKІSTAN. KAZINFORM — Kentaý qalasy ekologııalyq apat aımaǵy dep tanyldy jáne turǵyndar jalaqysyna 20% ústemeaqy qosylady. Bul týraly oblys ákimi Darhan Satybaldy aıtty. 

Óz jaýabynda ákim bul másele ondaǵan jyldar boıy kóterilip kele jatqanyn aıtty. 

«Shardara, Arys, Otyrar, Saýran aýdandarynyń jáne Túrkistan qalasynyń bir bóligi — bári de Aral mańyndaǵy daǵdarys aldyndaǵy aımaqqa jatady. Sondyqtan olar ekologııalyq aımaqqa enedi. Alaıda jaǵdaı mynadaı: Saýran aýdany Kentaý qalasymen shektesedi, onyń jartysy Kentaý qalasynyń aýmaǵynda ornalasqan jáne ekologııalyq apat aımaǵyna enbeıdi. Osyǵan baılanysty turǵyndar «Kentaýdy Aral mańynyń daǵdarys aldyndaǵy aımaǵyna qosý týraly» normatıvtik qujat qabyldaý máselesin kóterip jatyr», — dedi D. Satybaldy Ortalyq kommýnıkatsııalar qyzmetinde ótken baspasóz máslıhatynda.

Bul sheshim turǵyndar jalaqysyna 20% ústemeaqy qosýǵa múmkindik beredi. Bul úshin qosymsha 6 mıllıard teńge qajet.

«Densaýlyq saqtaý jáne Ekologııa mınıstrlikteri tıisti zertteýler júrgizip, ekologııanyń Kentaý turǵyndaryna da áser etetinin anyqtady. Osylaısha, Kentaýdy ekologııalyq aımaqqa engizýge bolady degen sheshim qabyldandy. Bul úshin qosymsha 6 mıllıard teńge qajet. Qazirgi ýaqytta osy qarajattyń qaıdan bólinetinin — respýblıkalyq nemese jergilikti bıýdjetten alý múmkindikterin qarastyryp jatyrmyz. Degenmen, jalpy alǵanda, mundaı sheshim qabyldanǵanyn aıtýǵa bolady», — dedi Darhan Satybaldy.

Tamyz aıynda Májilis depýtaty Ulasbek Sádibekov Kentaý qalasyndaǵy ekologııalyq jaǵdaı kúnnen-kúnge kúsheıgenin, aýa men sýdyń lastanýynan onkologııalyq aýrýlar da asqyna túskenin kótergen edi.