Kentaý ákiminiń qylmysy dáleldense, otstavkaǵa ketýge daıynmyn – Ómirzaq Shókeev

TÚRKІSTAN. QazAqparat – Túrkistan oblysynyń ákimi Ómirzaq Shókeev Kentaý qalasyn basqarǵan Dáýren Mahajanovtyń qylmysy dáleldense, otstavkaǵa ketýge daıyn ekendigin aıtty, dep habarlaıdy QazAqparat tilshisi.

«Qylmysy dáleldense, men ostavkaǵa ketýge daıynmyn. Sottyń sheshimi bolsa boldy», - dedi Ómirzaq Shókeev ortalyq kommýnıkatsııalar qyzmetinde ótken brıfıngide.

Aıta keteıik, 23 aqpanda Kentaý qalasynyń ákimi asa iri kólemde para aldy degen kúdikke ilingen bolatyn. Óziniń senimdi tulǵalary arqyly memlekettik-jekemenshik áriptestik aıasynda qaladaǵy avtokólik joldaryn jóndeýmen aınalysatyn seriktestik dırektorynan 98 500 AQSh dollaryn (42 mln 500 myń teńge) aldy degen aıyppen Almaty qalasy boıynsha Sybaılas jemqorlyqqa qarsy qyzmet sotqa deıingi tergeý júrgizip jatyr.