Kentaý ákimi qala mańyndaǵy aýyldardy aralap, halyqpen kezdesti
KENTAÝ. QazAqparat – Túrkistan oblysy Kentaý qalasynyń ákimi Dáýren Mahajanov 8 myńǵa jýyq turǵyny bar Oranǵaı aýylyna baryp, jergilikti halyqpen kezdesti, dep habarlaıdy QazAqparat tilshisi.
Dáýren Mahajanov aýyl ákimi Syzdyq Pirmetovtyń aýyldyń áleýmettik-ekonomıkalyq jaǵdaıy men aldaǵy damý josparlary jaıyndaǵy baıandamasyn tyńdady.
Atqarylǵan jumystarmen tanysyp shyqqan qala ákimi ár aýylǵa jasalǵan 3 jyldyq damý josparynyń oryndalý barysy jaıynda tolyqqandy málimet berdi. Oranǵaı aýylynyń bolashaǵy zor ekenin atap ótti. Máselen, osy óńirden ekonomıkalyq aımaq salynady. Ol jerde birneshe kásiporyn ashylyp, jumys kózi artady.
Sondaı-aq qala ákimi «Oranǵaı aýyly qalaǵa aınalady» dep atap ótti. Ol úshin aýylǵa ınfraqurylym júrgiziledi. Tolyqqandy jaryqpen qamtylyp, káriz júıesi ornatylady.
Jıynda aýyl turǵyndary jaryssózge shyǵyp, qala ákimine óz usynys-pikirlerin joldady. Birqatar máselelerdi kóterip, ásirese aýylda jyldan jylǵa halyq sany artyp, mektep jasyndaǵy balalarǵa jańa bilim ordasy qajet ekenin aıtyp ótti. Sonymen qatar, jol, jaryq jaıy da sóz boldy. Turǵyndardyń ótinishine nazar salǵan qala ákimi Dáýren Mahajanov atalǵan máseleler kezeń-kezeńimen sheshiletinin jetkizdi.
Aıta keteıik, búginde Oranǵaı aýyly 3 eldimekennen turady. Aýyl okrýgi boıynsha 181 sharýa qojalyq, memlekettik mekemede 484 qyzmetker jumys atqarady. 87 azamat jeke kásibin ashqan. Oranǵaı aýyldyq okrýginde birneshe kásiporyn jumys isteıdi.
