Kenshilerdiń jalaqysyn salyqtyń esebinen ulǵaıtý qajet - Radostovets
ASTANA. QazAqparat - Kenshilerdiń jalaqysyn ózin ózi jumyspen qamtyǵandarǵa salyq salý esebinen ulǵaıtý qajet. Mundaı pikirdi búgin elordadaǵy Táýelsizdik saraıynda ótip jatqan VIII Halyqaralyq taý-ken metallýrgııa kongresi aıasynda QR Taý-ken metallýrgııa kásiporyndary qaýymdastyǵynyń atqarýshy dırektory Nıkolaı Rodostovets bildirdi, dep habarlaıdy QazAqparat.
«Qazirgi ýaqytta qarjylyq júktemeni tómendetý qajet pe degen máseleni talqylaýdamyz. Óıtkeni, elimizde shamamen 3 mln ózin ózi jumyspen qamtyǵan adam bar. Olar múldem eshteńe tólemeıdi. Kópshiligi, úı sharýashylyǵymen aınalysady, qurysshylar áıteýir bir jerden qarjy tabady. Menińshe, jańa Salyq kodeksinde osy adamdardan memleket tym bolmaǵanda jylyna 50 myń teńge alatyndaı múmkindik jasaý qajet. Metallýrgtyń, kenshiniń jalaqysynan kásiporynnan óte kóp soma ustalady. Al adamdardyń joǵary aıtqan toby qoǵamda múldem kórinbeıdi. Olar bir jerlerden aqsha tabatyndyǵy aıqyn. Shyndyǵyna kelgende bul ádildik emes», - dedi ol kongress aıasynda BAQ ókilderine.
Onyń atap ótýinshe, kadr tapshylyǵy baıqalyp otyrǵan taý-ken metallýrgııa salasyndaǵy jalaqyny kóterý onyń tartymdylyǵyn arttyra túsedi. Búginde bul salada servıstik kompanııalarda jumys isteıtin qyzmetkerlerdi qosa alǵanda shamamen 1 mln adam jumys isteıdi.
«Shahter, metallýrg bolý jaqsy ekendigin qoǵamǵa bildirý qajet. Áıelderi kúıeýlerine: shahterlikke bar, ol jaqta jaqsy jaǵdaı jasalǵan, dep aıtýy tıis. Muny estigenderińiz bar ma? Barlyǵy da zańger bol, brokerlik jumysqa tur, dep jatady», - dedi Rodostovets.
