Kenshilerdiń zeınet jasyn kemitý qajet - ArselorMıttal
ASTANA. QazAqparat - «ArselorMıttal Temirtaý» AQ bas dırektory Paramjıt Kalonnyń aıtýynsha, búginde kásibı kenshilerdiń kóbi Reseıge kóship jatyr. Sebebi ol jaqta taý-ken salasynda isteıtin mamandar úshin zeınet jasyna erterek shyǵýǵa múmkindik bar, dep habarlaıdy QazAqparat tilshisi.
«Iá, kásibı mamandar alys jáne jaqyn shet elderge kóship jatyr. Óıtkeni basqa jerde áleýmettik jeńildikter kóp. Osynyń saldarynan Qazaqstan maman tapshylyǵy problemasyna tap bolyp otyr. Bizge de ońaı emes. Máselen, Qazaqstanda zeınetke 63 jasta shyǵady. Al Reseıde taý-ken jumysshylary 54-te zeınetker bola alady. Sol sebepti kásibı mamanǵa kórshi Reseıge kóship bara salǵan tıimdi. Adamdar buny jaqsy biledi. Osyǵan baılanysty biz Qazaqstan úkimetine xat joldap, taý-ken salasynda isteıtin jumysshylardyń zeınet jasyn kemitýdi usyndyq», - dedi Kalon búgin Astanada ótip jatqan VIII Halyqaralyq taý-ken metallýrgııa kongresinde.
Onyń aıtýynsha, asa aýyr óndiristerde, ásirese, jerdiń astynda kómir qazyp júrgen jumysshylarǵa 25 jyldan keıin zeınetkerlikke shyǵýǵa múmkindik berý kerek.
«Sonda 20 jastaǵy kenshi 45 jasta zeınetkerlikke shyǵa alsa, ary qaraı óz bilimin jetildirip, jumys isteı alady. Árıne, atalǵan máseleni jan-jaqty zerdelep, tıisti zańnamaǵa ózgeris engizý kerek. Degenmen, bir nárse anyq, osy sharany qolǵa almasaq, kásibı mamandardy ózimizde ustaý qıyn bolady», - dep atap kórsetti ArseloMıttaldyń bas dırektory.
