Kenshiler qalasynda kásip bastaýshylar qatary kóbeıdi
KENTAÝ. QazAqparat – Túrkistan oblysynyń Kentaý qalasyndaǵy 16 aýyldyq okrýgte ishki joldar jóndelip, áleýmettik nysandardyń qurylysy júrýde. Jergilikti turǵyndar arasynda egin egip, mal sharýashylyǵymen aınalysýshylar qatary da kóbeıip keledi, dep habarlaıdy QazAqparat tilshisi.
Máselen qalaǵa qarasty Shaǵa aýylynyń turǵyny, bes balanyń anasy Baıan Rataeva memleketten beriletin ataýly áleýmettik kómek retindegi qarjyǵa 80 taýyq pen eki sıyr satyp alǵan. Qazirgi tańda jumyrtqa men sút satyp, kúndelikti tabys taýyp otyr. Aldaǵy ýaqytta alatyn qarjysyna qora jaılaryn rettemek.
«Kóp balaly analardy qoldap otyrǵan memleket basshylaryna rahmet. Joldasym ekeýmizde jumyssyz edik. Qazir shaǵyn kásip ıesi atanyp otyrmyz», – deıdi Baıan Rataeva.
Búginde Shaǵa aýylynda 500-ge jýyq otbasy ataýly áleýmettik kómek alýǵa qujat tapsyrsa, onyń 400 jýyǵy qarjy alǵan. Aýyl turǵyndary osy qarajattar arqyly túrli kásipterin bastaǵan.
Aýyldaǵy «Erasyl» sharýa qojalyǵynda 1,5 gektar jerden bir kezeńde 120 tona ónim alynýda. Negizinen bolgar buryshy men qııar, qyzanaq, baklajan ósiriletin jylyjaıdan jylyna eki retten ónim alynady. Ónim pisken ýaqytta tapsyrys berýshiler arnaıy Astanadan kelip alyp ketedi eken.
Aýylda áleýmettik nysandar da boı kóterýde. Jańadan salynyp jatqan 600 oryndyq mektep bıylǵy jyly el ıgiligine beriledi dep josparlanýda. Aýyl mańyndaǵy 1 myń gektar jerge sondaı-aq, Túrkistan oblysynyń áýejaıy da salynýda. Áýejaıdyń qurylysy aıaqtalǵan kezeńde aýyl turǵyndary da turaqty jumyspen qamtylmaq.
