Keńsede qabyldap, kelisimshart jasasqan: Elordalyq boıjetken 25 adamdy aldady

NUR-SULTAN. QazAqparat – Elordada «memlekettik baǵdarlamamen baspana alýǵa kómektesemin» degen jeleýmen 25 adamnyń aqshasyn alǵan alaıaq ustaldy. Bul týraly Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.

Vedomstvo aqparatyna sáıkes, 27 jastaǵy qyz elorda turǵyndaryna memlekettik organdarda tanystary bar ekendigin aıtyp, belgili bir somaǵa memlekettik baǵdarlamamen páterli bolýǵa járdemdesýge ýáde bergen. Kúdikti alaıaqtyq áreketin júzege asyrý jáne adamdardyń kúdigin seıiltý maqsatynda fırma tirkep, arnaıy keńse jalǵa alǵan. Ol 2020 jyldyń naýryzy men tamyzy aralyǵynda zardap shegýshilermen memlekettik baǵdarlamaǵa qatysý týraly jalǵan kelisimsharttar jasasqan. Onyń alaıaqtyq áreketinen 25 adam zardap shekken.

«Zardar shegýshiler engizgen alǵashqy jarna somasy páterdiń aýdanyna baılanysty bolǵan. Ol óziniń syıaqysyn birden alǵan jáne ýádesin oryndaýǵa árekettenbegen. Osylaısha ol aldanyp qalǵan azamattardyń 56 mln teńgesin qaltasyna basqan. Kúdikti jasaǵan alaıaqtyq áreketin moıyndady. Onyń ústinen QRQK 190-baby 3-bóligi boıynsha tergeý júrgizilip jatyr. Sonymen qatar onyń elorda aýmaǵynda jasalǵan dál osyndaı qylmystarǵa qatysy tekserilý ústinde», - dedi departamentten.