«Keńse tili qazaqsha bolmaı is ońbaıdy»: Qarın áleýmettik jelidegi urandarǵa jaýap berdi

ASTANA. KAZINFORM — Memlekettik tildiń mártebesin kóterý til máselesin tý etip urandatýdan bastalmaıdy. Memlekettik keńesshi Erlan Qarın Konstıtýtsııalyq reforma jónindegi komıssııanyń búgingi otyrysynda osyndaı paıym aıtty.

— Osy kúnderi Sáken Seıfýllınniń «Keńse tili qazaqsha bolmaı is ońbaıdy» degen sózin arasynda áleýmettik jelide keltirgendi kórip júrmiz. Durys. Biraq, qazaq tili keńse tiline aınalýy úshin eń aldymen zańdarymyz, ásirese Ata Zańymyz memlekettik tilde durys, túsinikti, uǵynyqty jazylýy tıis, — dedi Erlan Qarın.

Onyń paıymdaýynsha, memlekettik tildiń mártebesin kóterý til máselesin tý etip urandatýdan emes, kózge kórine bermeıtin, kúndelikti, tyńǵylyqty sharýany talap etetin mańyzdy, kúrdeli jumystan bastalady.

— Jańa Konstıtýtsııanyń «Konstıtýtsııalyq qurylys negizderi» dep atalatyn І bóliminiń 3-babyndaǵy «jaýapty ári jasampaz otanshyldyq ıdeıasyn ornyqtyrý» degen negizgi qaǵıdat osyny bildiredi, ıaǵnı, mundaı eldik isterge aqylmen, syndarly kózqaraspen, naqty jumyspen, jasampazdyqpen kirisý mańyzdy, — dedi Memlekettik keńesshi. 

Aıta keteıik, jańa Konstıtýtsııanyń jobasyn túrli mekemeler, ujymdar talqylap jatyr. 

Budan buryn Erlan Qarın Konstıtýtsııamyz el tarıhynda tuńǵysh ret qazaq tilinde jazylyp jatqanyn aıtty.