Kennedıge jasalǵan qastandyq týraly vıdeo aýktsıonǵa qoıylady

ASTANA. KAZINFORM – Amerıka Qurama Shtattarynyń 35-shi prezıdenti Djon Kennedıdiń qastandyqtan keıin aýrýhanaǵa bara jatqan kortejiniń jańa vıdeosy Bostondaǵy (Massachýsets shtaty) RR Auction aýktsıonynda satylady. Bul týraly People basylymy habarlady.

Basylymnyń málimetinshe, aýktsıon 28 qyrkúıekte ótedi. Vıdeoda Parklend aýrýhanasyna qaraı asyǵyp kele jatqan kortejdi kórýge bolady. Onyń avtory Dallas qalasy turǵyny (Tehas shtaty) Deıl Karpenter edi. Ol qaıtys bolǵannan keıin beıne nemeresi Djeıms Geıtske qaldyrylǵan.

«Plenka plastık sút qorapshasynda saqtaldy. Ol meniń shkafymda birneshe jyl turdy», – deıdi Geıts.

RR Auctions atqarýshy vıtse-prezıdenti Bobbı Lıvıngstonnyń aıtýynsha, bul kadrlarda «Zaprýder fılminde» túsirilgen oqıǵalardan keıingi sátter beınelengen.

Aıta keteıik, Kennedıge jasalǵan qastandyq týraly 26 sekýndtyq vıdeo AQSh-ta «Zaprýder fılmi» degen atpen tanymal, sebebi ony kópshilik arasynda kınokameramen bolǵan Avraam Zaprýder túsirgen. Bul 486 kadrlyq fılm burynǵy prezıdenttiń ólimin beıneleıdi.

Amerıka Qurama Shtattarynyń 35-shi prezıdenti Kennedıge 1963 jyly 22 qarashada Tehasqa saılaýaldy sapary kezinde Dallasta qastandyq jasaldy. Qylmystan keıin qurylǵan resmı komıssııa bul Lı Harvı Osvaldtyń isi degen qorytyndyǵa kelgen. Komıssııa qorytyndysyna sáıkes, oq Dallastyń ortalyq alańynda ornalasqan mektep oqýlyqtary qoımasynyń altynshy qabatynan atylǵan. Ol jerden teleskoptyq kózdeýishi bar myltyq pen paıdalanylǵan patrondar tabylǵan.