Kennedıdiń ólimine qatysty qupııa qujattar jarııa etildi
ASTANA. QazAqparat - AQSh prezıdenti Donald Tramp Ulttyq arhıvtiń saıtynda Amerıkanyń 35-shi prezıdenti Djon Kennedıdiń ólimine qatysty 2,8 myń qupııa qujatty jarııa etý týraly buıryqqa qol qoıdy. Bul týraly Aq úı baspasóz qyzmeti málim etti, dep habarlaıdy QazAqparat Associated Press-ke silteme jasap.
Tramp atap ótkendeı, AQSh bıligi kópshiliktiń tarıhty ózgertken oqıǵa jaıly tolyǵyraq bilýi úshin prezıdent Djon Kennedıdiń ólimine qatysty qujattarǵa qoljetimdilikti qamtamasyz etpek.
Amerıka kóshbasshysy birqatar vedomstvolardyń talaptaryna sáıkes, bul taqyrypqa qatysty basqa da materıaldardyń qupııa saqtalatynyn naqtylady.
«Bizdiń ulttyq qaýipsizdigimizge zııany tıip ketpeý úshin osyndaı toqtamǵa keldik», - dedi Tramp.
Atalǵan qujattar AQSh Ulttyq arhıviniń saıtynda jarııalana bastady jáne bul protsess bir apta boıy jalǵasady.
Aıta keteıik, Djon Fıtsdjerald Kennedı 1917 jyldyń 29 mamyrynda Brýklaında (AQSh, Massachýsets shtaty) dúnıege kelgen. Ol 1960 jyly 43 jasynda AQSh tarıhyndaǵy eń jas prezıdent boldy. 1963 jyldyń 22 qarashasynda Dallasqa (Tehas shtaty) jasaǵan sapary kezinde óltirilgen edi. Úkimettik komıssııa prezıdentke Lı Harvı Osvald jalǵyz ózi qastandyq jasady degen qorytyndyǵa keldi. Alaıda, resmı nusqany AQSh jurtshylyǵy qabyldamady. Sebebi sarapshylar jınaǵan derekte prezıdentke ár túrli núkteden alty ret oq atqany kórsetilgen edi.
