Kennedı kitaphanasy alǵash ret Hemıngýeıdiń balalyq shaǵy týraly albomdy usynbaq
ASTANA. 22 shilde. QazAqparat - Bostondaǵy Djon Kennedıdiń prezıdenttik kitaphanasy kópshiliktiń nazaryna amerıkalyq jazýshy Ernest Hemıngýeıdiń balalyq shaǵy týraly estelik albomdardy usynbaq.
Ernest Hemıngýeı tyrnaqaldy áńgimesine qalam terbegenshe, onyń anasy óziniń uly týraly tutas bir kitap jazyp shyqqan. Búginde Djon Kennedı atyndaǵy kitaphananyń arqasynda 40 jyl boıy arnaıy qoımada saqtalǵan, teriden túptelgen 5 albom áleýmettik jelilerde qoljetimdi bolmaq.
Onda jas Hemıngýeıdiń kúndelikti tirligin sýretteıtin biregeı materıaldar qamtylǵan. Albomdar sýretterden, Hemıngýeıdiń balalyq shaǵyndaǵy aıtqan sózderinen, onyń ózi salǵan sýretterinen, anasynyń hattary men jazbalarynan turady.
