Kenııaǵa asharshylyq qaýpi tónip tur
ASTANA. QazAqparat - Kenııa eli birneshe jylǵa sozylǵan qurǵaqshylyqtan qatty zardap shegip otyr. Osyǵan baılanysty Birikken Ulttar Uıymy halyqaralyq qaýymdastyqty kómek berýge shaqyrdy, dep habarlaıdy «Habar 24».
Uıymnyń gýmanıtarlyq ister jónindegi basshysy Stıven O'Braıenniń aıtýynsha, tabıǵı apattan 4 mıllıonnan astam adamǵa asharshylyq qaýpi tónip tur. Qazirdiń ózinde 1 mıllıonnan astam turǵynǵa azyq-túlik jetispeı jatyr. Óıtkeni eldi jaılaǵan qýańshylyqtan mal qyryla bastaǵan.
Jergilikti bılik tótenshe jaǵdaı jarııalap, halyqqa kómekti kóbeıte bastady. Al aýa raıyn boljaý ortalyǵy taıaý arada jaýyn-shashyn bola qoımaıdy dep otyr.
