Kenııada tikushaq apatynan 7 adam kóz jumdy
ASTANA. KAZINFORM — Kenııanyń Ololokve taýynda tikushaq apatqa ushyrap, 7 adam kóz jumdy. Olardyń altaýy týrıst, bireýi ushqysh. Apattan eshkim aman qalǵan joq. Bul aqparatty Kenııa bıligi rastady, dep habarlaıdy Sınhýa.
Polıtsııanyń málimetinshe, Eurocopter EC130 B4 tikushaǵy (tirkeý nómiri — 5Y-GYM) jergilikti ýaqyt boıynsha saǵat 09:13 shamasynda Sambýrý okrýgindegi Ololokve taýynda qulaǵan.
— Apat saldarynan barlyq jolaýshy qaza tapty, — dep málimdedi polıtsııa.
Kóz jumǵandardyń arasynda Ekvadordyń Strategııalyq barlaý ortalyǵynyń bas dırektory Mıkel Sensı-Kontýgı de bolǵan. Ekvador prezıdentiniń ákimshiligi X áleýmettik jelisinde Sensı-Kontýgı men onyń jubaıy, dızaıner ári kásipker Stefanı Hollıhannyń qaza bolǵanyn rastady.
Quqyq qorǵaý organdarynyń habarlaýynsha, jeńil áýe kemesin Lady Lori charterlik kompanııasy paıdalanǵan. Tikushaq Laıkıpııa okrýgindegi Soıan ranchosynan Kenııanyń ortalyq bóligindegi Loısaba qoryǵyna baǵyt alǵan.
Apattyń naqty sebebi ázirge belgisiz. Jergilikti avıatsııa organdary oqıǵanyń mán-jaıyn anyqtaý úshin tergeý bastady.
Aıta keteıik, Grekııada orman órtin sóndirý kezinde eki tikushaq áýede soqtyǵysty.
