Kenııada sekta jetekshisi 191 adamdy óltirgeni úshin kináli dep tanyldy
ASTANA. KAZINFORM – Kenııalyq ýaǵyzshy Pol Makkenzı 190 balany jáne bir eresek adamdy óltirgeni úshin kináli dep tanyldy. Ol ózi qurǵan dinı sektanyń múshelerine balalardy ashtyqqa ushyratýdy buıyrǵan. Bul týraly BBC agenttigi jazdy.
Onymen birge kisi óltirýge qatysy bar 29 sybaılasy da kináli dep tanyldy. Makkenzıge qatysty úkim 6 qarashada jarııalanady.
Sot otyrysynda aıyptalýshylardyń barlyǵy eshkimdi óltirmegenin jáne ólimge májbúrlemegenin málimdedi. Alaıda tergeý men sot sektanyń músheleri adamdardy ashtyqqa ushyratyp qana qoımaı, olardy tunshyqtyryp, uryp-soǵyp óltirgen degen qorytyndyǵa keldi.
Úsh jyl buryn Úndi muhıtynyń jaǵalaýyna jaqyn ornalasqan, sekta lageri tigilgen Shakahola ormanynan 400-den astam adamnyń máıiti tabyldy. Osy oqıǵadan keıin 2023 jyly Makkenzı men sektanyń basqa da basshylary qamaýǵa alyndy. Olarǵa kisi óltirýden bólek, terrorızm, izbasarlaryn radıkaldandyrý jáne balalardy bilim alý quqyǵynan aıyrý aıyptary taǵyldy.
Makkenzı ózi qurǵan «Іzgi habardyń halyqaralyq qyzmeti» atty evangelıstik sektany basqarǵan. Ol balalardy ashtyqqa ushyratýǵa májbúrlep, osylaısha olardyń «Isamen tezirek qaýyshatynyna» sendirgen. Sondaı-aq qazirgi bilim berý júıesi men medıtsınany zulymdyq dep ýaǵyzdaǵan.
Makkenzıdiń sybaılastarynyń biri onyń oraza ustaý týraly nusqaýyna qarsy shyqqandardy «tepki men soqqynyń kómegimen kókke jiberý kerek» dep aıtqanyn jetkizdi. Sekta músheleri orman ishindegi taıaz qabirlerge jerleýdi «Másihpen nekelesý» dep ataǵan.
Máıitterdi qazyp alyp, syrtqa shyǵarý úshin jergilikti 17 turǵyn jaldanǵan. Olardyń biri Djeıms BBC tilshisine ár qabirden keminde úsh adamnyń máıiti tabylǵanyn aıtqan.
– Onda birneshe aptalyq qana bolǵan balalardyń súıekteri jatty. Bir qabirden birden 12 balanyń máıitin taptyq, – dep eske aldy ol.
Naırobıde buryn taksı júrgizýshisi bolǵan Pol Makkenzı sektany 2003 jyly qurǵan. 16 jyl ishinde onyń myńdaǵan izbasary paıda bolyp, Kenııanyń ár óńirinde bólimsheleri ashylǵan. Sonymen qatar Malındı qalasynan habar taratatyn Times TV atty jeke telearnasy bolǵan. Onda Makkenzıdiń ýaǵyzdary kórsetilgen.
2019 jyly ol sektanyń negizgi bólimshesin jaýyp, izbasarlarymen birge Malındı qalasynan shamamen 70 shaqyrym qashyqtyqtaǵy Shakahola ormanyna kóshken.
Kelesi tórt jyl ishinde sol jerde qaza tapqandardyń kópshiliginiń kim ekeni áli kúnge deıin anyqtalǵan joq. Olardyń máıitteri qatty shirip ketken. Sot qujattarynda marqumdar, mysaly, «jynysy er bala, jeke basy anyqtalmaǵan» degen sıpattamamen, qabirdiń koordınattary jáne tabylǵan kúni kórsetilip tirkelgen.
Soǵan qaramastan, keıbir izbasarlary Makkenzıge áli de senedi. Kenııalyq jas jigit Pıter Shýkranı Shakahola ormanynda ólim aýzynan qalǵan. Anasy sektanyń ýaǵyzyna senip, onyń dárilerin Qudaıǵa qarsy zulymdyq dep sanap, laqtyryp tastaǵan. Jigitti ormannan zembilmen alyp shyǵyp, aýrýhanada birneshe apta emdegen.
Alaıda osy oqıǵadan keıin de ol Makkenzıdi ózine qamqorlyq jasaǵan jaqsy adam dep sanaıdy.
– Makkenzı eshkimdi oraza ustaýǵa májbúrlegen joq. Adamdar sengendikten, mundaı sheshimdi ózderi qabyldady. Men ony báribir jaqsy kóremin jáne ol áli de meniń rýhanı jetekshim, – dedi Shýkranı sot úkimi jarııalanar aldynda jýrnalısterge.
Aıta keteıik, buǵan deıin 2023 jyly Kenııada ashtyqtan kóz jumǵan sektanttar sany 372 adamǵa jetkenin jazǵan edik. Olar Qudaımen kezdesý úshin ashyǵyp ólgen.
