Kenııada laı kóshkininen 30-ǵa jýyq adam kóz jumdy
NAIROBI. QazAqparat - Kenııada qolaısyz aýa raıynan bolǵan laı kóshkini saldarynan 29 adam qaza tapty, dep habarlaıdy QazAqparat BBC News-ke silteme jasap.
Batys Pokot okrýgindegi Nıarkýlıan men Parýa eldi mekenderinde, Ýgandamen shekaraǵa jaqyn mańda bolǵan kóshki tolassyz jaýǵan jańbyrdan týyndaǵan.
Jergilikti sheneýnikterdiń aıtýynsha, aýylǵa baratyn joldardy sý basyp, bir kópir qulaǵan.
Prezıdent Ýhýrý Kenıatta qaza tapqandardyń týystary men dostaryna kóńil aıtty.
Sondaı-aq, Kenıatta óz málimdemesinde okrýgtiń ınfraqurylymyna aıtarlyqtaı zalal keltirilgenin atap ótti. Ol osy aýdandaǵy qarýly kúshter men qutqarý qyzmetine zardap shekkenderge kómek kórsetýdi tapsyrdy.
Bastapqy derek boıynsha, qazirgi ýaqytta qaza tapqandardyń arasynda jeti bala bar.
Eldiń ishki ister mınıstri Fred Matıangı qutqarý operatsııasynyń «jalǵasyp jatqanyn», «qolaısyz aýa raıy» kóshkin saldarynan keltirilgen zalaldyń kólemin tolyq baǵalaýǵa kedergi keltirip jatqanyn málim etti.
Áleýmettik jelilerde tarap jatqan sýretterden okrýgtiń kóshelerindegi qıraǵan aǵashtardy, laı sýdy jáne úıindilerdi kórýge bolady.
18 qarashada Kenııa meteorologııalyq qyzmeti jańbyrdyń tolassyz jaýatynyn eskertip, kóshkin qaýpi bar aýdandardaǵy turǵyndarǵa «joǵary deńgeıde daıyn bolýǵa» keńes berdi.
Sońǵy aptalarda Afrıkanyń shyǵys bóligindegi kóptegen elderde jańbyr jaýyp jatyr.
Kóshkin men kenetten bolǵan sý tasqyny saldarynan Efıopııa men Tanzanııada adamdar qaza taýyp, Somalıde júzdegen myń adam úı-kúısiz qaldy.
