Kenııada qonaqúıge terrorıstik shabýyl jasaldy
Jergilikti BAQ-tyń habarlaýynsha, qonaqúıde aldymen jarylys bolǵan, onyń sońynan atys estilgen. Lańkestik aktige jaýapkershilikti «Ash-Shabab» terrorıstik toby óz moınyna aldy.
«Polıtsııa oqıǵa ornyn qorshaýǵa aldy», - delingen Anadoly saıtynda.
Al Sınhýa agenttiginiń jazýynsha, Kenııanyń kúsh qurylymdary Naırobıdegi qonaqúı-keńse keshenin óz baqylaýyna alý úshin lańkestermen kúresti áli de jalǵastyrýda. Oqıǵa ornynan qutqarylǵan, qaza bolǵan jáne zardap shekkender týraly resmı málimetter ázirge joq.
«Qarýlanǵan qylmyskerler ǵımaratta ekeni belgili. Arnaıy jasaq jaýyngerleri qazirgi ýaqytta olarǵa qarsy operatsııa júrgizýde», - dedi Kenııa polıtsııasynyń bas ınspektory Djozef Boınet.
«Kenııanyń keıbir aýrýhanalarynda donorlyq qandy qabyldaý pýnktteri ashylǵan. Kenııanyń sheteldik elshilikteri terrorıstik shabýylǵa baılanysty óz azamattaryn abaı bolýǵa shaqyrdy. Shabýyl úshin jaýapkershilikti «Ash-Shabab» ekstremıstik toby óz moınyna aldy», - dep jazdy Sınhýa.
Associated Press-ke silteme jasap Belta agenttigi habarlaǵandaı, qonaqúıge shabýyldy qarýlanǵan birneshe adam jasaǵan.
«Jergilikti polıtsııanyń málimetine sáıkes, Dusit keshenine shabýyl eki jarylystan keıin bastaldy. Olardyń birin qonaqúıdiń kireberis zalynda jankeshti-lańkes jasaǵan. Jarylys saldarynan oteldiń kóptegen qonaqtary jaraqattandy. Keıin qarýdan oq atylǵan. Qyskóılerge qarsy operatsııa áli de jalǵasýda. Olar ǵımarat ishinde. Polıtsııa bólmelerdi aralap, jasyrynyp otyrǵan otel qonaqtary men qyzmetkerlerine syrtqa shyǵýǵa kómektesýde», - delingen agenttik aqparatynda.
Oqıǵa kýágerleri kem degende bes adamnyń qaza bolǵanyn aıtýda.
