Kenııada Ebola karantın ortalyǵyn ashýǵa qarsy sherý kezinde eki adam qaza tapty
ASTANA. KAZINFORM – Kenııa polıtsııasy elde amerıkalyq Ebola naýqastaryna arnalǵan oqshaýlaý ortalyǵyn ashý josparyna qarsy shyqqan eki narazylyq bildirýshini atyp óltirdi, dep habarlaıdy Euronews.
Polıtsııa áskerı bazaǵa qaraı sherýletip bara jatqan, joldardy jaýyp, avtokólik dóńgelekterin órtegen demonstranttarǵa qarsy kózden jas aǵyzatyn gaz ben oq atty. Qaza tapqan eki adamnyń da ólimine oq jaraqaty sebep bolǵan.
Habarlarǵa qaraǵanda, olardyń biri dúken ıesi bolǵan. Ol tártipsizdikterge baılanysty saýda ornyn jaýyp, úıine qaıtýǵa áreket jasaǵan kezde oqıǵaǵa tap bolǵan.
Kenııanyń ortalyq bóligindegi Nanıýkı qalasynda júzdegen adam Laıkıpııa áýe bazasy aýmaǵynda AQSh azamattaryna arnalǵan Ebolaǵa qarsy karantın ortalyǵyn qurý josparyna qarsy sherýge shyqty.
Narazylyqtar Kenııanyń Joǵarǵy soty mekemeniń jumysyn jáne sheteldik naýqastardy qabyldaýdy ýaqytsha toqtatqannan eki kún ótken soń bastaldy. Bul talap aryzdy Kenııa zańgerler qoǵamy men konstıtýtsııalyq baqylaý organy bergen.
Uıymdar Kenııanyń densaýlyq saqtaý júıesiniń álsizdigin alǵa tartyp, Ebola juqtyrǵan sheteldik azamattardy el aýmaǵynda karantınge ornalastyrýǵa qarsy shyqty.
Kenııa bıligi beısenbi kúni AQSh shetelde júrip Ebola juqtyrǵan óz azamattaryn elge qaıtarýdyń ornyna Kenııaǵa jiberýdi josparlap otyrǵanyn málimdedi. Aq úıdiń josparyna sáıkes karantın ortalyǵy Laıkıpııa áýe bazasynda ornalasyp, juma kúni 50 oryndyq bólimshe retinde jumysyn bastaýy tıis bolǵan.
Eske sala ketsek, buǵan deıin Kenııada Ebolaǵa kúdikti adamdarǵa arnalǵan ortalyqtyń ashylýyna qarsy jappaı narazylyq aktsııalary ótip jatqany habarlandy.
