Kenııada ashtyqtan kóz jumǵan sektanttar sany 372 adamǵa jetti
NAIROBI. QazAqparat - Kenııa polıtsııasy dinı sektanyń qyzmetin tergeý barysynda taǵy 12 adamnyń máıitin qazyp aldy, olardyń izbasarlary Qudaımen kezdesý úshin ashtan ólgen.
Qaza tapqandar sany 372 adamǵa jetti, dep habarlaıdy QazAqparat Anadoly aqparat agenttigine silteme jasap.
Eksgýmatsııa operatsııanyń tórtinshi kezeńiniń úshinshi kúni ótti.
Polıtsııanyń málimetinshe, bıylǵy sáýirden bastap pastor Pol Makkenzı bastaǵan sektadan 95 adam shyǵaryldy. Ashyǵýdan aman qalǵan bul adamdar endi qoǵamǵa qaıta ený úshin qajetti qoldaý alady.
Buǵan deıin Kenııanyń ishki ister mınıstri Kıtýre Kındıkı sektaǵa adamdardy jaldaýǵa múmkindik bergen quqyq qorǵaý organdarynyń qyzmetkerleri zań aldynda jaýapqa tartylatynyn málimdedi.
Bılik adamdar jappaı jerlengen 40 oryndy anyqtady.
Kenııadaǵy «Іzgi habar» halyqaralyq shirkeýin basqaratyn Makkenzı sektasynyń qyzmetin tergeý aıasynda sáýir aıynyń ortasynan bastap Kılıfı okrýginiń Shakahola ormanynan júzdegen máıit tabyldy.
Ol izbasarlaryna aqyr zamanǵa deıin aspanǵa jetý úshin ashtan ólýdi buıyrdy dep aıyptalýda.
Keıbir qurbandardyń ishki organdary kesilgen, bul adam aǵzalarynyń saýdasyna kúdik týǵyzdy.
