Keńgir sý qoımasy memleket menshigine ótti

ASTANA. KAZINFORM — Prokýrordyń aktisi boıynsha Keńgir sý qoımasynyń gıdrotehnıkalyq qurylystary memleketke qaıtaryldy, dep habarlaıdy Ulytaý oblystyq prokýratýrasy.

Ulytaý oblysynyń ıgilikteriniń biri, sondaı-aq energetıka jáne ırrıgatsııa salasynda sýdyń basty retteýshisi — Keńgir sý qoımasy sanalady. Sý qoımasy 1952 jyly salynǵan (319 mıllıon sharshy metr) jáne onyń gıdrotehnıkalyq qurylystary strategııalyq obektiler katarynda, demek memleket menshiginde bolýy tıis. Óz kezinde bul obektiler qala quraýshy kásiporyn «Kazakhmys Distribution» JShS balansyna berilgen.

— Múlikti qaıtarý úshin oblys prokýratýrasy Sý resýrstary mınıstriniń atyna usyný engizdi. Prokýrorlyq qadaǵalaý aktisin oryndaý maqsatynda syıǵa tartý sharty jasalyp, obektini berý aktisine qol qoıyldy. Endi ýákiletti organdar olardy jańǵyrtý jóninde odan ári sharalar qabyldaý maqsatynda sý qoımasy men onyń gıdrotehnıkalyq qurylystaryna kóp faktorly zertteý jumystaryn júrgizý qajet, — dep atap ótti vedomstvo.

Osyǵan deıin Almaty prokýratýrasy Abaı atyndaǵy QazUPÝ ulttyq ýnıversıtetine oqý korpýstary men stadıonyn qaıtarǵanyn jazdyq.