Keńeıtilgen otyrys. ІІM-de Prezıdent tapsyrmalaryn iske asyrý barysy qaraldy
ASTANA. KAZINFORM — Іshki ister mınıstrliginde Memleket basshysynyń Úkimettiń keńeıtilgen otyrysynda bergen tapsyrmalaryn iske asyrý boıynsha jedel keńes ótkizildi, dep habarlaıdy Polisia.kz.

Keńes barysynda eldegi qaýipsizdikti qamtamasyz etýge qatysty negizgi máseleler qaraldy.
«Zań men Tártip» qaǵıdatyn tıimdi júzege asyrý úshin Іshki ister organdarynda 2025 jyl «Profılaktıka jyly: polıtsııa Zań men Tártip kúzetinde» dep jarııalanǵan bolatyn. Osy baǵytta mınıstr qylmystyń aldyn alý jónindegi sharalar keshenin iske asyrý, onyń ishinde jeke profılaktıkalyq is-sharalardy kúsheıtý, qylmys jasaýǵa beıim adamdardy erte kezeńde júıeli túrde anyqtaý boıynsha mindetter júktedi, sondaı-aq jurtshylyqty aldyn alý salasyna belsendi tartý qajettigin alǵa tartty.
Vedomstvo basshysy múddeli organdarmen birlesip mektepterde, kolledjderde jáne joǵary oqý oryndarynda oqıtyn jastardyń boıynda patrıotızm, jaýapkershilik jáne minez-qulyq mádenıetin qalyptastyrý boıynsha maqsatty aqparattyq-nasıhattaý jumysyn uıymdastyrýdy tapsyrdy.
— Úkimet otyrysynda ınfraqurylymdyq damý, tsıfrlyq tehnologııalardy engizý jáne energetıka salasynyń ilgerileýi de negizgi baǵyt retinde atap ótildi. Sondyqtan júk tasymalynyń qaýipsizdigin qamtamasyz etýdi, munaı ónimderin urlaýdyń jáne olardy shetelge zańsyz áketýdiń qylmystyq shemalaryn anyqtaý boıynsha jumysty jandandyrýdy tapsyramyn, — dep atap ótti mınıstr.
Sondaı-aq Erjan Sadenov qyzmet basshylary men óńirlik bólinisterdiń jetekshileriniń aldyna ınternet-alaıaqtyqqa qarsy is-qımyl, tsıfrlyq jobalardy damytý, tıisti kóshi-qondy baqylaýdy mindetti túrde qamtamasyz ete otyryp, sheteldik jumys kúshin tartýǵa baılanysty rásimderdi jaqsartý, azamattardyń ótinishterimen jumys tıimdiligin arttyrý boıynsha birqatar naqty mindetter qoıdy.
Budan bólek, aǵymdaǵy jyldyń ótken kezeńindegi jedel qyzmettiń nátıjeleri qaraldy, onyń barysynda jumystyń naqty baǵyttary boıynsha tapsyrmalar berildi.
Eske salsaq, 28 qańtarda Prezıdent Qasym-Jomart Toqaevtyń qatysýymen Úkimettiń keńeıtilgen otyrysy ótkenin jazǵan edik.