Kenetten qaıtys bolǵan senator Gúlmıra Kárimovanyń ornyna 3 kandıdat usynyldy

PETROPAVL. QazAqparat – Soltústik Qazaqstan oblysynan Senat depýtaty bolyp saılanyp, mezgilsiz kóz jumǵan Gúlmıra Kárimovanyń mandatyn ıelenýge nıetti 3 kandıdat qujat tapsyrdy, dep habarlaıdy QazAqparat tilshisi.

«24 sáýirde Soltústik Qazaqstan oblystyq saılaý komıssııasyna QR Parlamenti Senatynyń depýtattyǵyna ózin-ózi usyný tártibimen usynylǵan 3 kandıdattan qujat kelip tústi:

Mahınıa Evgenıı Sergeevıch;

Esdáýletov Jaqsylyq Tóleýuly;

Jalǵasbaev Birjan Nurmahanuly.

Kandıdattardyń QR Konstıtýtsııasynyń jáne «QR saılaý týraly» Konstıtýtsııalyq zańynyń talaptaryna sáıkestigi anyqtalyp jatyr», - delingen ákimdiktiń resmı saıtynda jarııalanǵan habarlamada.

Esterińizge sala ketsek, 27 qańtarda jańadan saılanǵan senator Gúlmıra Kárimova kenetten qaıtys boldy. Oǵan aldyn ala «anafılaksııalyq shok» degen dıagnoz qoıyldy. Degenmen, keıin Astana qalalyq Qoǵamdyq densaýlyq saqtaý basqarmasynyń baspasóz qyzmeti Gúlmıra Kárimovanyń ólimine tikeleı sebep júrek talmasy ekenin málim etti.

Keıin Ortalyq saılaý komıssııasy tóraǵasynyń orynbasary Konstantın Petrov Gúlmıra Kárimovanyń ornyna jańa senator saılaý qashan ótetinin málim etti.