Kenetten qaıtys bolǵan senator Gúlmıra Kárimovanyń mandaty úshin depýtat saılaýy maýsymda ótedi

ASTANA. QazAqparat – Soltústik Qazaqstan oblysynan Senat depýtaty bolyp saılanyp, mezgilsiz kóz jumǵan Gúlmıra Kárimovanyń bos qalǵan mandatyn ıelený úshin 2 maýsymda saılaý ótedi, dep habarlaıdy QazAqparat tilshisi.

«QR saılaý týraly» Konstıtýtsııalyq Zańynyń 26-babynyń 2, 4-tarmaqtaryna sáıkes, Soltústik Qazaqstan oblystyq saılaý komıssııasy tanysý úshin QR Parlamenti Senatyna Soltústik Qazaqstan oblysynan depýtat saılaý jónindegi tańdaýshylardyń tizimi bekitildi. Árbir saılaýshy tizimdegi ózi týraly derekterdi tekserýge jáne tizimge engizilmegenine, durys engizilmegenine, sondaı-aq tizimde tańdaýshylar týraly derekterde jiberilgen dálsizdikterge shaǵymdanýǵa quqyly», - delingen ákimdiktiń resmı saıtynda jarııalanǵan habarlamada.

Aıta keteıik, Senat depýtattaryn jergilikti maslıhattardyń depýtattary saılaıdy. Maýsym aıynda óńirde ótetin saılaýǵa SQO-daǵy maslıhattardan 193 tańdaýshy qatysady. Olardyń tolyq tizimimen myna silteme arqyly ótip, tanysýǵa bolady.

Buǵan deıin habarlaǵanymyzdaı, oblystyq saılaý komıssııasyna ózin-ózi usyný tártibimen Parlament Senatynyń depýtattyǵyna úmitti myna 7 kandıdat qujat tapsyrǵan:

- Melehov Sergeı Vladımırovıch;

- Mahınıa Evgenıı Sergeevıch;

- Esdáýletov Jaqsylyq Tóleýuly;

- Jalǵasbaev Birjan Nurmahanuly;

- Rafalskıı Anatolıı Bronıslavovıch;

- Rahmetova Ásem Qalashbaıqyzy;

- Qasenova Raýza Ivanovna.

«Bir kandıdattyń QR Konstıtýtsııasynyń jáne «QR saılaý týraly» zańynyń talaptaryna, ıaǵnı QR men SQO aýmaǵynda turaqty turý bóligine sáıkes kelmeýine baılanysty usynylýy toqtatyldy. Bir kandıdat óz erkimen kandıdatýrasyn qaıtaryp aldy. 5 kandıdattyń talaptarǵa sáıkestigi anyqtaldy. Parlament Senatynyń depýtattyǵyna kandıdattardy qoldaý úshin saılaýshylardyń qoldaryn jınaý rásimi bastaldy», - delingen ákimdik saıtynda jarııalanǵan habarlamada.

Esterińizge sala ketsek, 27 qańtarda jańadan saılanǵan senator Gúlmıra Kárimova kenetten qaıtys boldy.

Oǵan «anafılaksııalyq shok» aldyn ala dıagnozy qoıyldy. Degenmen, keıin Astana qalalyq Qoǵamdyq densaýlyq saqtaý basqarmasynyń baspasóz qyzmeti Gúlmıra Kárimovanyń ólimine tikeleı sebep júrek talmasy ekenin aıtty.

Keıin Ortalyq saılaý komıssııasy tóraǵasynyń orynbasary Konstantın Petrov Gúlmıra Kárimovanyń ornyna jańa senatordy saılaý qashan ótetinin málim etti.