Keńestik kezeńdi birjaqty baǵalaýǵa bolmaıdy – Qasym-Jomart Toqaev

ASTANA. KAZINFORM – Memleket basshysy Qasym-Jomart Toqaev Ulttyq quryltaıdyń kezekti otyrysynda keńestik kezeńdi birjaqty talqylaýǵa bolmaıtynyn aıtty.

- Búginde otandyq tarıh ǵylymynyń, zııalylarymyzdyń aldynda jan-jaqty órkenıettik paradıgma turǵysynda tarıhymyzdy zerdeleý mindeti tur. Týrasyn aıtar bolsaq, osy ýaqytqa deıin Qazaqstannyń ótkenin kóptegen ǵalym, qoǵam qaıratkerleri tarıhı qaıǵy-qasiret turǵysynda qaraıdy. Bul tarıhymyzdy qabyldaý aıasyn taryltady. Biz keńirek jáne jan-jaqty oılaýymyz kerek. Osy múmkindikti paıdalana otyryp, keńestik kezeń týraly birjaqty taldaý men paıymdaýǵa qarsy eskertý jasaǵym keledi. Menińshe, biz úshin ortaq tarıhta árıne, kúńgirt te, jarqyn da kezeń boldy. Muny jaqsy túsiný kerek. Áıtpese, bizde qoǵamdyq-saıası damýdyń teris jolyna túsiretin aǵat túsinikterdiń tutqynynda bolý qaýpi bar, - dedi Prezıdent.

Buǵan deıin Memleket basshysy Kókshe tórindegi quryltaıda osydan úsh jyl buryn naýryz aıynda jarııalaǵan Joldaýyna saı júrgizilgen qoǵamdyq-saıası reformalarǵa toqtalyp, el ishindegi oń ózgeristerge Ulttyq quryltaı músheleri de orasan zor úles qosqanyn atap ótkenin jazǵan edik.