Keńeste aýyl sharýashylyǵy salasyndaǵy yqpaldastyqqa aıryqsha mán berildi
ASTANA. KAZINFORM – Keńeste aýyl sharýashylyǵy salasyndaǵy yntymaqtastyq máseleleri qaraldy. Bul týraly Aqordanyń baspasóz qyzmeti habarlady.
Byltyr eki eldiń agroónerkásip keshenindegi taýar aınalymy 25 paıyzdan asyp, 360 mıllıon dollarǵa jýyqtaǵan.
Birqatar ınvestıtsııalyq joba iske asyp jatyr. Qasym-Jomart Toqaev Tiryaki Agro qolǵa alǵan glıýten men krahmal óndirisin, Alarko Holding salyp jatqan jylyjaı keshenin mysalǵa keltirdi.
Túrkııa tarapyna Aýyl sharýashylyǵy ónimderiniń ózara saýdasyn jandandyrý jóninde 2026-2028 jyldarǵa arnalǵan jol kartasyn qabyldaý usynyldy.
Jıynda qazirgi geosaıası jaǵdaıda kólik-logıstıka salasynyń strategııalyq mańyzy arta túskenine nazar aýdaryldy.
Memleket basshysy bul rette Transkaspıı halyqaralyq kólik dálizine ózge elderdiń qyzyǵýshylyǵy artyp kele jatqanyna toqtalyp, túrik kompanııalaryn Quryq, Aqtaý porttary arqyly júk tasymalyn ulǵaıtýdy kózdeıtin jobalarǵa belsendi atsalysýǵa shaqyrdy.
Qazaqstan avıatsııa salasyndaǵy yntymaqtastyqqa da aıryqsha mán berip otyr. Sondyqtan Almaty halyqaralyq áýejaıyn Ortalyq Azııadaǵy logıstıkalyq hab retinde damytýdy kózdep otyrǵan TAV Airports Holding kompanııasynyń bastamalaryna jan-jaqty qoldaý kórsetiledi.
Bul rette Memleket basshysy elimizde ınvestıtsııalyq ahýaldy jaqsartý úshin atqarylyp jatqan aýqymdy jumystar, ınvestorlarǵa arnalǵan jeńildikter jóninde málimet berdi.
Sonymen qatar Túrkııa bıznesmenderin shıkizattyq emes jobalardy birlese iske asyrýǵa úndedi.
Jıynda energetıka, taý-ken, tsıfrlandyrý jáne jasandy ıntellekt, qorǵanys ónerkásibindegi ózara tıimdi seriktestik aıasyn odan ári keńeıtý perspektıvasy qarastyryldy.
Eske sala keteıik, buǵan deıin Qasym-Jomart Toqaev pen Rejep Taııp Erdoǵan Qazaqstan – Túrkııa Joǵary deńgeıdegi strategııalyq yntymaqtastyq keńesiniń altynshy otyrysyn ótkizgenin habarlaǵan edik.
