Kenesary sý qoımasyndaǵy jaǵdaı baqylaýda - Aqmola oblysy
KÓKShETAÝ. QazAqparat - Aqmola oblysynyń Býrabaı aýdanynda aǵyn sý Kenesary sý qoımasyn buzyp ketti. Bul týraly brıfıngte oblystyq Tótenshe jaǵdaılar departamenti basshysynyń orynbasary Manarbek Shapaǵatov aıtty, dep habarlaıdy QazAqparat tilshisi.
Departament ókiliniń sózine qaraǵanda, tótenshe jaǵdaı naýryzdyń 31-de tańǵy saǵat 04:25 shamasynda bolǵan. Erigen qardyń sýy men jańbyrdan Kenesary sý qoımasyndaǵy sýdyń deńgeıi kóterilgen. Osynyń saldarynan sý bógettiń (uzyndyǵy 30 metr, bıiktigi 4 metr) aýmaǵyn buzyp ketken.
«Qazirgi kezde, sý Qylshaqty ózeniniń boıymen Ivanovka sý qoımasyna qaraı aǵýda. Boljam boıynsha Ivanovka sý qoımasyna 2-2,5 mıllıon tekshe metr, Kókshetaý qalasyna 1,5-2 mıllıon tekshe metr sý kelýi múmkin. Osyǵan baılanysty Kenesary jáne Ivanovka sý bógetteri, Kókshetaý qalasynda Qylshaqty ózeniniń boıynda baqylaý beketteri ornalastyrylyp, sý deńgeıine monıtorıng júrgizilýde», - deıdi Manarbek Shapaǵatov.
Brıfıngte aıtylǵandaı sý tasqynynyń qaterin aldyn alý men tótenshe jaǵdaıdyń saldaryn joıý jumystaryna 258 adam jáne 20 arnaıy tehnıka jumyldyryldy.
Onyń ishinde Kenesary bógetiniń baqylaý beketine TJD jeke quramynan 130 adam jáne 3 arnaıy tehnıka, jergilikti atqarýshy organdardan 40 adam jáne 5 tehnıka, Býrabaı aýdandyq PB 9 adam jáne 3 tehnıka, Ivanovka sý qoımasyndaǵy baqylaý beketine TJD jeke quramynan 7 adam jáne 4 arnaıy tehnıka, jergilikti atqarýshy organdardan 7 adam jáne 5 tehnıka, TJD órt sóndirý jáne apattyq qutqarý otrıadynan 22 adam jáne 1 tehnıka, TJD jedel qutqarý otrıadynan 7 adam, 3 tehnıka jáne 1 júzý quraly, Býrabaı aýdandyq PB 9 adam jáne 3 tehnıka, Kókshetaýdaǵy Qylshaqty ózeni boıyndaǵy baqylaý beketinde TJD jeke quramynan 8 adam jáne 3 arnaıy tehnıka, jergilikti atqarýshy organdardan 13 adam jáne 10 tehnıka, Kókshetaý qalalyq PB 8 adam jáne 3 tehnıka bar.
«Bógettiń buzylýyna sol mańyndaǵy Kenesary aýylyndaǵy turǵyn úılerge sý basý qateri tónip turǵan joq. Jaǵdaı baqylaýda», - dep tolyqtyrdy Manarbek Shapaǵatov.
