Keńes Raqyshev bokstan álem chempıonatynyń jeńimpazdaryna óz qarajatynan 100 myń dollardan bermek

ASTANA. QazAqparat – Qazaqstan boks federatsııasynyń prezıdenti Keńes Raqyshev Tashkentte ótetin álem chempıonatynda jeńimpaz atanǵan elimiz sportshylaryna jeke qarajaty esebinen 100 myń dollardan beredi, dep habarlaıdy QazAqparat federatsııa aqparatyna silteme jasap.

«Boks – elimizdegi eń tanymal ári eń nátıjeli sport túri. Sondyqtan, Tashkenttegi álem chempıonaty jankúıerlerdiń erekshe nazarynda bolary anyq. Qazaqstan boks federatsııasy, bapkerler jáne sportshylardyń ózderi aldaǵy dodaǵa tııanaqty daıyndalý úshin bar kúsh-jigerin jumsady (...)

Jigittermizdi yntalandyrý maqsatynda, jeńimpazdar men júldegerlerdi dástúrli túrde óz qarajatym esebinen qosymsha syıaqymen marapattaımyn. Chempıondarǵa 100 myń AQSh dollarynan qarastyrylǵan.

Boksshylarǵa aıtar basty tilegim – esimderińizdi tarıhta qaldyryńyzdar. Sizderge búkil Qazaqstan jankúıer bolatynyn umytpańyzdar!», - dep keltiredi boks federatsııasy K.Raqyshevtiń sózin.

Sondaı-aq federatsııa basshysy Qazaqstan sportshylaryna qoldaý bildirýge shaqyrdy.

«Demeý bolsa, ulttyq quramanyń boksshylary aıanyp qalmasy anyq. Birlik bar jerde – tirlik bar. Barlyǵymyz bir judyryq bolyp jumylsaq, alynbaıtyn qamal joq. Álemdik arenada taǵy bir márte úzdik ataný úshin qaýqarymyz jetedi», - deıdi ol.

Aıta keteıik, buǵan deıingi álem birinshiliginde Qazaqstan quramasy 2 altyn, 2 kúmis, 1 qola júlde ıelengen bolatyn.