Keńes Odaǵynyń Batyry T.Kómekbaevty eske alýǵa arnalǵan sambodan halyqaralyq týrnır márege jetti

Bıyl on jetinshi márte ótkizilip otyrǵan bul týrnır birneshe jyldan beri halyqaralyq sambo federatsııasynyń kúntizbelik josparyna engizilgen. Sondyqtan onda jeńimpaz atanǵandar birden sport sheberi ataǵyn alady. Osynyń ózi jan-jaqtan jınalatyn jas samboshylar úshin úlken serpilis bolyp tabylady. Óz kezeginde bul týrnırdiń jyl saıyn qatysýshylarǵa toly ótýine sebepker bolýda.

Týrnırdiń ashylý saltanatynda sóz alǵan Qarmaqshy aýdanynyń ákimi Murat Ergeshbaev bul memorıaldyń sporttyq rýhty kóterip, jigerdi tasytqannan basqa, jurtty salaýatty turmys saltyna baýlý tárizdi nasıhattyq baǵyty da bar ekenine nazar aýdardy.

 Týrnırde Qyzylorda oblysynyń namysyn Qarmaqshy aýdanynyń samboshylary qorǵady. Olar bul senimdi molynan aqtap, komandalyq birinshi oryndy qamtamasyz etti. Týrnırdiń jeńimpazy ataǵyna qarmaqshylyqtar Baýyrjan Raıysov, Qaırat Jalǵasbaev, Erjan Abdýllaev jáne Jasulan Dosymov qol jetkizdi. Qalǵan bas júldelerdi óz salmaqtary boıynsha tájikstandyqtar Akmalıddın Karımov pen Mýstafo Hasanov, jambyldyqtar Ertýǵan Tórenov pen Beıbit Ystybaev oljalady. Taǵy bir altyn medal aqtóbelik Temirlan Qaldybaevtyń qanjyǵasynda ketti.

Jyl saıynǵy dástúr boıynsha týrnırdiń sońy qazaq kúresinen absolıýtti chempıon ataǵyn anyqtaý saıysyna ulasty. Onda tarazdyq Beıbit Ystybaevtyń baǵy jandy. Barlyq qarsylasyn utqan oǵan bir mıllıon teńge kóleminde júlde tabys etildi. Týrnırde sambodan chempıon atanǵandar men júldeger tanylǵandar da qomaqty qarjylaı syıaqylar aldy.