Keńes Odaǵynyń Batyry ataǵyn eki márte ıelengen qazaqstandyqtar

ASTANA. QazAqparat - Bıyl Uly Otan soǵysyndaǵy Jeńistiń 69 jyldyǵy toılanady. El tarıhyndaǵy eń aýyr jyldary halqymyz naǵyz erliktiń úlgisin kórsetti. «Myń ólip, myń tirilgen» qazaq halqy tarıhta nebir zulmatty jyldar men qandy qyrǵyndardy bastan ótkerip, bútindeı bir ulttyń joıylyp ketýine jol bere jazdaǵan qanshama surqııa saıasat pen aramza áreketterdi bastan ótkerdi. Solardyń «at aýyzdyǵymen sý ishken, er etigimen sý keshken» eń bir qaıǵyly kezeńderi Uly Otan soǵysymen baılanysty.

Osy jyldary asyǵa kútken Jeńisti jaqyndatýǵa qazaqstandyq qaharmandar zor úles qosty. Soǵys jyldarynda 500 qazaqstandyq Keńes Odaǵynyń Batyry ataǵyna ıe boldy. 4 dańqty jerlesimiz Batyr ataǵyn eki márte ıelendi. Bul - Talǵat Bıgeldınov, Leonıd Beda, Ivan Pavlov jáne Sergeı Lýganskıı.

Avıatsııa general-maıory, Keńes Odaǵynyń eki márte batyry, «Barys» ordeniniń ıegeri Talǵat Jaqypbekuly Bıgeldınov. Avıatsııa general-maıory, Keńes Odaǵynyń eki márte batyry, «Barys» ordeniniń ıegeri. 1922 jyly 5 tamyzda Saryarqanyń keń-baıtaq dalasynda, Aqmola oblysynyń ózen-kóli tasyǵan, emdik sýy atqylaǵan Maıbalyq aýylynda týǵan. 1942 jyly maıdanǵa attanady. Kók júzinde 500 saǵat bolady. 305 ret áskerı shabýylǵa shyǵyp, jaý uıasy - Berlındi alýǵa birinshi bolyp qatysady. Fashıster ózderine aıaýsyz ólim oǵyn sepken Talǵat mingen ushaqty «Qara ajal» dep ataǵan. 23 jasynda Keńes Odaǵynyń eki márte batyry ataǵyn ıelenip, soǵysta nebir kózsiz erlik kórsetken qyran qazaq qan maıdannan aman-esen oralǵan soń, áskerı áýe akademııasyn aıaqtaıdy. Qazaqstannyń áskerı-áýe kúshterinde túrli basqarý qyzmetinde bolady. KSRO Joǵarǵy Keńesiniń úsh márte depýtaty bolyp saılanady.

Beda Leonıd Ignatevıch (16. 8.1920, Qostanaı oblysy Uzynqol aýdany Novopokrovka s. - 26.12.1976) - ekinshi dúnıejúzilik soǵysqa qatysýshy, avıatsııa general-leıtenant (1972), ushqysh-shabýyldaýshy. KSRO-ǵa eńbek sińirgen áskerı ushqysh. 1942 jyldyń tamyz aıynda maıdanǵa jiberildi. Ol Stalıngrad, Donbass, Taganrog, Kenıgsberg qalalaryn azat etý shaıqastaryna qatysty. 75-gvardııalyń avıatsııalyq shabýyldaýshy polktiń áskadrılıa komandıri 1944 jyldyń sáýirine deıin 109 ret áskerı tapsyrmamen jaý áskeri shoǵyrlanǵan jerler men bekinisterin shabýyldady. Osy erlikteri úshin KSRO Joǵary Keńesi Tóralqasynyń Jarlygymen Keńes Odaǵynyń Batyry ataǵy berildi (26.10.1944). Sol polktiń (Z-Belarýs maıdany, 1-áýe armııasy, 1-gvardııalyq shabýyldaýshy avıatsııalyq dıvızııa) komandıriniń orynbasary bola júrip, 105 áskerı tapsyrmany oryndady. Osy erlikteri úshin KSRO Joǵary Keńesi Tóralqasynyń Jarlyǵymen Bedaǵa ekinshi ret Keńes Odaǵynyń Batyry ataǵy berildi (29.6.1945). Lenın, 4 ret Qyzyl Tý, Aleksandr Nevskıı, l-dárejeli Otan soǵysy, «Qyzyl Juldyz» ordenderimen, medaldarmen marapattalǵan. Áskerı qyzmettegi mindetin oryndaý kezinde qaza tapty.

Pavlov Ivan Fomıch- (25.6. 1922, Qostanaı oblysy, Meńdiqara aýdany - 12.10.1950) - qazaqstandyq ushqysh, maıor (1948), 2 márte Keńes Odaǵynyń Batyry (4.2.1944 jáne 23.2.1945 jyldary). Soǵysqa 1942 jyly jeltoqsannan qatysty. Ushqysh, aǵa ushqysh, zveno komandıri, avıaeskadrılıanyń komandıri, shtýrmandar avıapolkiniń shtýrmany boldy. Kalının, Ortalyq, 1-Prıbaltıka maıdandarynda 200-den asa áýe shabýylyna qatysyp, jeke ózi jaýdyń 3 ushaǵyn atyp túsirdi. Jaýyngerlik mindetin atqarý ústinde qazaǵa ushyrady. 2 ret Lenın, 2 márte Qyzyl Tý, Aleksandr Nevskıı, 2-dárejeli Otan soǵysy ordenderimen jáne medaldarmen marapattalǵan. Pavlov músini Qostanaı qalasynda ornatylǵan.

Lýganskıı Sergeı Danılovıch (1.10.1918, Almaty qalasy - 1977, sonda) - qazaqstandyq ushqysh, eki márte Keńes Odaǵynyń Batyry (2.9. 1943; 1.7.1944). 2-dúnıejúzilik soǵys kezinde Lýganskıı 390 ret ushý saparyna shyǵyp, jaýdyń 37 ushaǵyn atyp túsirdi. 2 ret áýe taranyn jasady. Soǵystan keıingi jyldary KSRO QK-niń áskerı áýe kúshteri salasynda ár túrli joǵary basshylyq qyzmetterde boldy.