Keńes Odaǵy ıadrolyq soǵysqa qalaı daıyndaldy

  ASTANA. QazAqparat - QR Parlament Májilisiniń depýtaty Abaı Tasbolatov keńester kezinde áskerdiń ıadrolyq soǵysqa qalaı daıyndalǵanyn aıtyp berdi, dep xabarlaıdy QazAqparat tilshisi.

«Men áskerı salada 43 jyl qyzmet ettim. Sonyń ishinde 23 jylymdy Keńes armııasynda ótkizdim. Ashyǵyn aıtaıyn, sol kezde bizdi ıadrolyq soǵysqa daıyndady. Áli esimde, Frýnze atyndaǵy áskerı akademııada oqyǵanda meniń dıplomdyq jumysym motoatqyshtar dıvızııasynyń ıadrolyq qarýdyń kómegimen shabýyl jasaý taktıkasyna arnaldy. Sol kezde dıplomdyq jumystardyń 60 protsenti, oqý-jattyǵýlar da ıadrolyq qarýdy qoldaný máselesin qamtydy. Taktıkalyq qarýdan bastap jahandyq aýqymǵa deıingi sharalar boldy. Ókinishke qaraı, áskerı adamdardyń ózderi ıadrolyq qarýdyń qaýip-qaterin túsinbedi. Bizdi jaýdy joıýǵa ǵana úıretti. Al ondaı soǵystyń saldary qandaı bolatynyn aıtpady», - dedi A.Tasbolatov ıadrolyq qarýsyzdandyrýǵa arnalǵan konferentsııada.

Onyń aıtýynsha, oqý-jattyǵýlar kezinde áskerılerdiń jeke is-qımylynan bastap brondalǵan texnıkamen áreket etýge deıingi barlyq sharalar atqaryldy.

«Shyny kerek, bunyń bári eshkimdi qutqarmaıtyn edi. Japonııanyń ıadrolyq qarýdan qalaısha zardap shekkenin bárimiz jaqsy bilemiz. Qazaqstan jerinde 400-den astam jarylys boldy. 1,5 mıllıon adam zardap shekti, adamdar áli kúnge sonyń zardabyn tartyp keledi», - dep atap kórsetti A.Tasbolatov.
Aıta keteıik, búgin Astanada «Qazaqstan men Japonııanyń ıadrolyq qarýsyzdandyrý salasyndaǵy yntymaqtastyǵy: «Bir taǵdyr, jalpy maqsat» taqyrybynda xalyqaralyq konferentsııa ótti.

Sharanyń uıymdastyrýshylary - QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýty, sondaı-aq, Goı beıbitshilik qory.

Konferentsııada ıadrolyq qarýsyzdandyrý salasyndaǵy ózekti máseleler talqyǵa salyndy. Búginde Japonııa osy salada Qazaqstannyń negizgi seriktesteriniń biri bolyp sanalady. Atalǵan memleket te ıadrolyq qarýdyń taýqymetin kórdi. Sol sebepti ıadrolyq qarýǵa qarsy úsh qaǵıdasyna júginip, álem elderin ıadrolyq qarýsyzdandyrý qozǵalysyna qosylýǵa úndep otyrady. Al Qazaqstan «Semeı-Nevada» qozǵalysy, «Atom» baǵdarlamasy jáne ıAdrolyq qarýdan bas tartýdyń Halyqaralyq kúni sııaqty batyl bastamalardy iske asyra bildi.