Keńes ǵaryshkerleri Alakól kýrorttyq aımaǵyna keldi
ASTANA. QazAqparat - Shara Elbasynyń Alakóldi damytý boıynsha tapsyrmasyn oryndaý aıasynda kýrorttyq aımaqqa ishki jáne reseılik týrısterdiń legin arttyrý maqsatynda ótkizilip otyr, dep habarlaıdy QazAqparat tilshisi.
QR Mádenıet jáne sport mınıstrligi men «Kazakh Tourism» ulttyq kompanııasy shaqyrýymen is-sharaǵa Qazaqstannyń Halyq qaharmany, avıatsııa general-leıtenanty Talǵat Musabaev, keńes ǵaryshkeri, Keńes odaǵynyń batyry Anatolıı Artsebarskıı, Qazaqstan jáne Reseı ǵaryshkeri, polkovnık, Qazaqstannyń Halyq qaharmany jáne Reseı Federatsııasynyń qaharmany ıÝrıı Malenchenko, Reseı Federatsııasynyń ǵaryshkeri ıÝrıı Batýrın qatysýda.
«Alakóldiń sýyn qazaqtyń batyrlary erte zamannan beri jońǵarlarmen shaıqastan keıin emdelý úshin qoldanǵan degen ańyz bar. Keıbiriniń aıtýynsha, osy aımaqta álsiregen jáne jaraqattanǵan jaýyngerlerin emdeý úshin Shyńǵys han túmenderimen kelip otyrǵan. Osy ańyzdardyń barlyǵyn keńes ǵaryshkerleriniń ǵarysh radıatsııasynan tazarý men sapardan keıingi medıtsınalyq qaıta qalpyna keltirý kezeńderiniń birin Alakólde ótkizgeni týraly tarıhı derekter rastaıdy dese bolady», - deıdi QR Mádenıet jáne sport mınıstrliginiń Týrızm ındýstrııasy komıtetiniń tóraıymy Maınıýra Mýrzamadıeva.
Ertede ǵaryshqa sapardan keıingi qaıta qalpyna keltirý sharalary kóldiń shyǵys jaǵalaýynda ótkizilgeni belgili. Biraq, osy joly uıymdastyrýshylar ǵarysh ardagerlerine kóldiń ońtústik jaǵalaýyn kórsetýde.
Ǵaryshkerlerdiń baǵdarlamasy saýyqtyrý protsedýralaryn, SPA jáne belsendi demalys túrlerin qamtıdy.
Ǵaryshkerlerdiń aıtýynsha shıpajaılyq-kýrorttyq saýyqtyrý olardyń kásibı qyzmetin jalǵastyrý úshin qajetti jáne ǵarysh saparynan keıingi qalpyna kelýdiń qorytyndy kezeńi bolyp tabylady.
