Keńes Dúısekeev: «Sazger» degen sóz namysyma tıedi...
ASTANA. QazAqparat - «Sazger degen sóz namysyma tıedi. Kompozıtor men sazgerdiń aıyrmashylyǵyn kópshiligi eskere bermeıdi», dedi belgili kompozıtor, QR Eńbek sińirgen qaıratkeri Keńes Dúısekeev L.N. Gýmılev atyndaǵy Eýrazııa ulttyq ýnıversıtetinde «Káýsar» mádenı-tanymdyq birlestigi uıymdastyrǵan kezdesýde. Bul týraly «Astana aqshamy» gazetinde jazyldy.
- «Dalaǵa shyǵyp taıaq laqtyrsań, kompozıtorsymaqqa tıedi. «Do» men «re»-niń arasyna taksımen baryp keletin adamdar kóbeıip ketti» dep 1979 jyly qazaqtyń óte talantty kompozıtory marqum Ábilahat Espaev maǵan bir aıtyp edi. Sol sózdiń naǵyz kókesin endi kórip júrmiz: qaltasyn toltyryp, taltańdap stýdııaǵa barady, eki notanyń basyn qosa almaı, yńyldaǵan birdeńesin jazdyrady. Aqshasyn tólep, ánshige aıtqyzady. Bir-eki ret efırden kórinip, «men kompozıtormyn» dep kókirek keretin jigitter tolyp júr. Ókinishtisi, tek jigitter ǵana emes. Al, kompozıtor degen... Mysaly, «Sazger» degen sóz namysyma tıedi. Sazgerler - arnaıy kompozıtorlyq bilim almaı, yńyldap án shyǵaratyndar. Keńes ókimetiniń tusynda olardy áýesqoı deıtin. Kompozıtor latynnyń «compositor» - qurastyrýshy degen sózinen shyqqan. Ándi bastan-aıaq oranjırovkasyna deıin ózim daıyndaımyn. Osy kompozıtor men sazgerdiń aıyrmashylyǵyn kópshiligi eskere bermeıdi, - dedi Keńes Dúısekeev.
