Keńes dáýirindegi Qazaqstan demografııasy zerttelip jatyr – Oljas Bektenov

ASTANA. KAZINFORM – Premer-mınıstr Oljas Bektenov Senat depýtatynyń saýalyna joldaǵan jaýapta Qazaqstan tarıhynyń jańa 7 tomdyǵy aıasynda Keńes dáýirindegi demografııa máseleleri zerttelip jatqanyn málim etti.

- Memleket basshysynyń tapsyrmasyna sáıkes otandyq tarıhshy ǵalymdar «Ejelgi dáýirden búgingi kúnge deıingi Qazaqstan tarıhy» atty jańa jeti tomdyq akademııalyq basylym ázirlep jatyr. 7 tom aıasynda keńes dáýiriniń demografııasy máseleleri keńinen zerttelip jatyr, - dep jazylǵan jaýapta.

Sondaı-aq, ol depýtattyń Demografııalyq protsesterdi taldaýdyń ulttyq ortalyǵyn qurý týraly usynysyn qazir oryndaý múmkin emes ekenin aıtqan.

- Úkimet 2026 jylǵy 31 jeltoqsanǵa deıin kvazımemlekettik sektor sýbektilerin qurýǵa moratorıı engizgenin habarlaımyz, - delingen Úkimet basshysynyń jaýabynda.

Oljas Bektenov Qazaqstandaǵy demografııalyq ósim tendentsııalary tabys deńgeıi ortashadan joǵary elderdiń kórsetkishinen joǵary ekenin eske salady.

- Halyqaralyq uıymdardyń (Birikken Ulttar Uıymynyń Damý baǵdarlamasy) taldaýyna sáıkes Qazaqstanda aıtarlyqtaı demografııalyq ózgerister bolyp jatyr. Halyq sany búginde 20,3 mln adamnan 2050 jyly 24,3 mln adamǵa deıin ósedi dep boljanyp otyr (ósim 23%). Bul ósý ómir súrý uzaqtyǵynyń ulǵaıýyna jáne týýdyń salystyrmaly túrde joǵary kórsetkishterine baılanysty – bir áıelge 3 bala. Bul tabys deńgeıi ortasha deńgeıden joǵary basqa elderdiń kórsetkishterinen aıtarlyqtaı joǵary, - deıdi Premer-mınıstr.

Ese salsaq, Senatta ótken jıynda Qoldanbaly etnosaıası zertteýler ınstıtýty-qoldanbaly zertteýler ortalyǵynyń dırektory Dinmuhammed Ǵalı de demografııa jáne kóshi-qon salasyn retteıtin bólek memlekettik organ qurýdy usynǵan bolatyn.