Keńes áskeriniń Aýǵanstannan shyǵarylýynyń 25 jyldyǵyna oraı kontsert ótedi
ASTANA. QazAqparat - 15 aqpan kúni elordadaǵy Beıbitshilik jáne Kelisim saraıynda Keńes áskeriniń Aýǵanstannan shyǵarylýynyń 25 jyldyǵyna oraı saltanatty patrıottyq kontsert ótedi. Bul týraly qalalyq «Aýǵanstan soǵysy múgedekteri men ardagerleri odaǵy» QB habarlady, dep jazady elorda ákimdiginiń resmı saıty.
Atalǵan is-sharaǵa qaza bolǵan jaýyngerlerdiń týystary, Aýǵan soǵysynyń ardagerleri, túrli qoǵamdyq uıymdardyń ókilderi men resmı tulǵalar, qaladaǵy orta jáne joǵary oqý oryndarynyń oqýshylary men áskerı bólimshelerdiń ókilderi shaqyryldy.
Mine, Aýǵanstannan Keńes áskerleri shyǵarylǵan kúnnen beri 25 jyl ótti. Osy aıtýly kúnge oraı, 15 aqpanda Astana qalasynyń «Aýǵanstan soǵysy múgedekteri men ardagerleri odaǵy» QB qaza bolǵan jáne dúnıeden ótken jaýyngerler men ofıtserlerdi máńgi este qaldyrý maqsatynda birqatar is-sharalar ótkizedi. Dástúr boıynsha bul kúni Aýǵan soǵysynyń jaýyngerleri, qaza bolǵandardyń ata-analary, dostary, jaqyndary ortalyq meshitke jáne pravoslav shirkeýine barady. Sondaı-aq, saǵat 12.00-de Q.Muńaıtpasov jáne Abylaıhan dańǵylynyń qıylysyndaǵy Aýǵanstanda qaza tapqan ınternatsıonalıst-jaýyngerlerge arnalǵan respýblıkalyq memorıalda da sharalar uıymdastyrylady.
Aıta keteıik, 1979 jyldyń 25 jeltoqsanynan 1989 jyldyń 15 aqpanyna deıin on jylǵa jýyq ýaqyt boıy Keńes áskerleriniń shekteýli kontıngentiniń 40-shy áskeriniń jaýyngerleri Aýǵan aýmaǵynda ınternatsıonaldyq boryshtaryn ótedi. Bul soǵysta 600 myńnan astam sarbaz ben ofıtser ózderiniń áskerı mindetin adal atqardy. Ásker quramynda bolǵan 22 269 qazaqstandyq qandy qyrǵynǵa qatysty, sonyń ishinde 924-i qaza tapsa, 1015-si elge múgedek bolyp oralǵan. Al 21 adam habar-osharsyz ketken.
