Keneden qalaı qorǵanýǵa bolady — maman keńesi

ASTANA. KAZINFORM — Kóktem mezgiliniń bastalýymen Qazaqstanda kenelerdiń belsendilik kezeńi bastalady. Qazirgi tańda kene shaǵýyna baılanysty 478 adam dárigerlerge júgingen, alaıda kene entsefalıti jaǵdaılary tirkelgen joq, dep habarlaıdy DSM baspasóz qyzmeti.

— Kúnniń jylynýyna baılanysty, ásirese tabıǵat aıasynda kenelerge tap bolý qaýpi artady. Qazaqstanda juqtyrý qaýpi joǵary 7 endemııalyq óńir anyqtalǵan: Almaty qalasy, Almaty, Shyǵys Qazaqstan, Jetisý oblystary, sondaı-aq Abaı, Aqmola jáne Soltústik Qazaqstan oblystarynyń jekelegen aýdandary, — delingen mınıstrlik habarlamasynda.

Kene entsefalıti — keneniń shaǵýy arqyly beriletin vırýstyq aýrý, ol mı men julyndy zaqymdaýy múmkin. Aýyr jaǵdaılarda bul dert kúrdeli asqynýlarǵa ákelýi yqtımal, sondyqtan der kezinde qorǵaný sharalaryn qabyldaý mańyzdy.

Qazir epıdemıologııalyq jaǵdaı turaqty:

• aýrý jaǵdaılary tirkelmegen;
• kene shaǵýyna baılanysty 478 adam medıtsınalyq kómekke júgingen, onyń ishinde 232-si — balalar;
• zardap shekkenderdiń basym bóligi (97%) qajetti profılaktıkalyq kómek alǵan.

Elde maýsymǵa daıyndyq aldyn ala júrgizilip jatyr:

• qaýip toptaryn vaktsınatsııalaý jalǵasyp keledi (5 845 adam egildi);
• vaktsınalar men ımmýnoglobýlınniń jetkilikti qory bar;
• Almaty, Almaty jáne Jetisý oblystarynda kenege qarsy óńdeý jumystary bastaldy.

Kene shaǵýyna qarsy qandaı profılaktıkalyq sharalar bar?

— Vaktsınatsııalaý — eń senimdi qorǵanys tásili (aldyn ala josparlaǵan jón);
— Kıim — jabyq, ashyq tústi, jeńi tyǵyz manjetaly bolýy tıis;
— Repellentter — kenelerge qarsy arnaıy quraldardy paıdalaný;
— Tabıǵattaǵy minez-qulyq — bıik shópterden aýlaq bolý, ózińizdi jáne balalardy únemi tekserip otyrý;
— Qaýipsiz tamaqtaný — sútti mindetti túrde qaınatyp ishý.

Eger kene terige jabysyp qalsa, sabyr saqtap, durys áreket etý qajet:

— keneni pıntset nemese jip kómegimen abaılap alyp tastaý;
— shaǵý ornyn antıseptıkpen óńdeý;
— múmkindiginshe keneni zerthanaǵa taldaýǵa tapsyrý;
— mindetti túrde dárigerge qaralý — qajet bolǵan jaǵdaıda 72 saǵat ishinde ımmýnoglobýlın engiziledi.

Osydan buryn Shyǵys Qazaqstan turǵyndaryn kene shaǵa bastaǵanyn jazǵanbyz.