Kene shaqqan jaǵdaıda ne isteý kerek — dáriger keńesi
ASTANA. KAZINFORM — Elimizde kene belsendiligi áli de saqtalyp otyr. Osyǵan baılanysty mamandar turǵyndardy tabıǵat aıasynda saqtyq sharalaryn muqııat oryndaýǵa shaqyrdy.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málimdedi.
Onyń aıtýynsha, ormanǵa, saıabaqqa jáne basqa da tabıǵı jerlerge barǵanda deneni tolyq jabatyn kıim kıgen durys. Uzyn jeńdi jeıdeniń jeńi bilekte túımelenip, jeıde shalbardyń ishine salynady, al shalbar shulyqtyń nemese etiktiń qonyshyna kirgiziledi. Bas pen moıyndy oramalmen, kapıýshonmen nemese jaǵasy bıik kıimmen jaýyp júrgen jón.
Sondaı-aq keneden qorǵaıtyn arnaıy quraldardy qoldanyp, kıim men deneniń ashyq jerlerin jıi qarap turǵan durys.
— Eger kene denege jabysyp qalsa, ony ózińiz alýǵa tyryspaı, múmkindiginshe tezirek medıtsınalyq kómekke júginińiz. Bul keneni qaýipsiz alyp tastaýǵa ári qajet bolsa shuǵyl profılaktıkany der kezinde júrgizýge múmkindik beredi. Al kene shaqqannan keıin dene qyzýy kóterilse, bas aýyrsa, álsizdik sezilse nemese basqa da jaısyz belgiler baıqalsa, dereý dárigerge qaralyp, mindetti túrde kene shaqqanyn aıtyńyz, — dedi Sarhat Beısenova.
Eske salaıyq, buǵan deıin Qazaqstanda kene shaqqan 13 myńnan astam adamnyń medıtsınalyq kómekke júgingeni týraly jazǵan edik.
