Kene shaqqan 12 myńǵa jýyq adamǵa ımmýnoglobýlın egildi
ASTANA. KAZINFORM — Qazaqstanda kene shaqqan 12 myńǵa jýyq adamǵa kene entsefalıtiniń aldyn alý úshin ımmýnoglobýlın egildi. Bul kene shaqqan adamdardyń 90 paıyzdan astamyna der kezinde shuǵyl profılaktıka jasalǵanyn kórsetedi. Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málimdedi.
— Kene shaqqan adamdardyń 90 paıyzdan astamyna shuǵyl profılaktıka júrgizildi. Al ımmýnoglobýlın keıbir jaǵdaıda egilgen joq. Atap aıtqanda, kene tabıǵı oshaǵy joq aýmaqta shaqsa, adam medıtsınalyq kómekke kesh júginse, buryn kene entsefalıtine qarsy vaktsına alsa, medıtsınalyq qarsy kórsetilimi bolsa nemese ekpeden bas tartsa, shuǵyl profılaktıka júrgizilmeıdi, — dedi Sarhat Beısenova.
Onyń aıtýynsha, qazir kene entsefalıti taralǵan óńirlerde shamamen 16 lıtr ımmýnoglobýlın qory bar. Maýsym aıaqtalǵanǵa deıin bul qor jetkilikti bolýy úshin óńirlik densaýlyq saqtaý basqarmalary qosymsha 31 lıtrden astam ımmýnoglobýlın satyp alýǵa ótinim bergen.
— Kene entsefalıtine qarsy josparly ekpe tabıǵı oshaqtarda jumys isteıtin azamattarǵa salynady. Olardyń qatarynda ormanshylar, qoryqshylar, geologııalyq barlaý mamandary, ańshylar jáne qyzmetine baılanysty tabıǵı oshaqtarda eńbek etetin ózge de mamandar bar. Jyl basynan beri ekpe alýǵa tıis 29 730 adamnyń 9 myńnan astamy vaktsına alǵan, — dedi ol.
Sarhat Beısenovanyń sózinshe, kene entsefalıtiniń tabıǵı oshaqtarynda kenege qarsy óńdeý jumystary jalǵasyp jatyr. Qazir elimizdegi barlyq endemııalyq óńirde óńdeýdiń birinshi kezeńi aıaqtaldy. Almaty qalasynda, Almaty oblysynda jáne Jetisý oblysynda ekinshi kezeń de aıaqtaldy. Qalǵan óńirlerde jumystar bekitilgen kestege sáıkes tamyz aıynyń ekinshi onkúndiginen jalǵasady.
Eske salaıyq, buǵan deıin Qazaqstanda kene shaqqan 13 myńnan astam adamnyń medıtsınalyq kómekke júgingeni týraly jazǵan edik.
