Kene maýsymy bastaldy: ShQO turǵyndaryna epıdemıologtar eskertý jasady

ÓSKEMEN. KAZINFORM - Shyǵys Qazaqstan oblysynda sáýir aıynda kene maýsymy bastaldy.

ShQO sanıtarlyq-epıdemıologııalyq baqylaý departamentiniń málimetinshe, kenelerdiń belsendiligi aýa temperatýrasy men ylǵaldylyǵyna tikeleı baılanysty.

- Keneler +3+5 gradýs shamasyndaǵy aýa temperatýrasynda oıana bastaıdy, al +15 gradýstan joǵary bolsa, belsendiligi kúrt artady. Uzaq merzimdi baqylaýlar kórsetkendeı, kene shaǵýdyń qaýipti kezeńi sáýirden qyrkúıekke deıin sozylady, - dep habarlady departamenttiń baspasóz qyzmetinen.

Shyǵys Qazaqstan respýblıkada kene entsefalıtin juqtyrý qaýpiniń joǵary aımaǵyna jatady. Óńirde aýrýshańdyq deńgeıi Qazaqstan boıynsha ortasha kórsetkishten 4,1 ese joǵary.

- Turǵyndarǵa tabıǵat aıasyna shyqqanda qorǵanys kıimderin kıip, repellentterdi paıdalanýdy usynamyz. Eger sizdi kene shaǵyp alsa, birden dárigerge baryńyz, - dep eskertti epıdemıologtar.

Eske salsaq, osyǵan deıin Almatyda kenelerge qarsy dezınsektsııalyq óńdeý jumystary bastalǵany habarlanǵan.