Kene borrelıozy: Almatyda qansha adam aýyrdy
ALMATY. QazAqparat- Almatyda epıdemııalyq maýsym bastalǵaly qalanyń medıtsınalyq uıymdaryna kenege qatysty 182 adam júgindi.Onyń 100-i bala. Barlyǵyna der kezinde shuǵyl medıtsınalyq kómek kórsetildi, dep habarlaıdy QazAqparat tilshisi.
«Shuǵyl medıtsınalyq kómek barlyǵyna der kezinde kórsetildi, kenege qarsy ımmýnoglobýlın salyndy. Byltyr kene borrelıozynyń 9 jaǵdaıy tirkelse, bıyl birde-bir aýrý tirkelgen joq», - deıdi qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova.
Ol keneler kene entsefalıti jáne kene borrelıozy sııaqty juqpaly aýrýlardyń tasymaldaýshysy ekenin atap ótti. Kenelerdiń belesendi maýsymy naýryz-qazan aılaryna keledi, al eń joǵary kórsetkish mamyr men maýsymda tirkeledi.
«Kene borrelıozy (Laım aýrýy) – borrelıı tektes spırohetalardan týyndaıtyn transmıssıvti, tabıǵı oshaqty aýrý. Kene borrelıozynyń ınfektsııasy zaqymdanǵan kene shaqqanda paıda bolady. Kene silekeıindegi borrelıı terige enip, birneshe saǵat ishinde kóbeıedi, sodan keıin teriniń basqa aımaqtaryna jáne ishki aǵzalarǵa (júrek, mı, býyndar jáne t.b.) taralady. Borrelıı uzaq ýaqyt (jyldar) adam aǵzasynda saqtalýy múmkin, bul aýrýdyń sozylmaly jáne qaıtalanatyn aǵymyn týdyrady. Inkýbatsııalyq kezeń 2 kúnnen 30 kúnge deıin, ortasha alǵanda - 2 aptaǵa deıin sozylýy múmkin»,- dedi ol.
Aýrýdyń belgisi – kene shaǵý ornynda teriniń qyzarýy. Qyzyl daqtyń shetteri birtindep ulǵaıady, onyń dıametri 1-10 sm, keıde 30 sm-ge deıin nemese odan da úlken bolady.
«Kene borrelıozyn emdeý tek aýrýhanada júrgizilýi kerek. Emdelmegen jaǵdaıda aýrý asqynyp, keıbir jaǵdaılarda júıke júıesi men býyndardyń zaqymdanýynan múgedektikke ákeledi»,-dedi Ásel Qalyqova.
