Kendirli zaýytynyń tuşytylǵan teńiz sýynyń birinshi kólemi Jańaózen qalasynyń sý taratý jelisine berildi
AQTAÝ. KAZINFORM – Mańǵystaý oblysynda «QazMunaıGaz» UK AQ (QMG) Basqarma tóraǵasy Ashat Hasenov, óńir ákimi Nurdáýlet Qılybaı jáne munaı-gaz salasynyń ardagerleri Kendirlidegi teńiz sýyn tuşytý zaýytynda boldy.
Bul iri áleýmettik joba Memleket basshysynyń tapsyrmasy boıynsha iske asyrylýda jáne strategııalyq mańyzǵa ıe. Zaýyt Jańaózen men irgeles jatqan eldi mekenderdiń turǵyndaryn aýyz sýmen qamtamasyz etedi. Sondaı-aq nysan «Astrahan — Mańǵyshlaq» magıstraldy sý qubyryna júktemeni azaıtyp, óńirdegi ónerkásip áleýetin damytýǵa yqpal etedi.
Búgingi tańda qýaty táýligine 12 500 tekshe metr bolatyn alǵashqy óndiristik jeli sátti iske qosylyp, jumys istep tur. Zerthanalyq taldaý sýdyń sapasy sanıtarlyq-gıgıenalyq normalarǵa tolyq saı ekenin rastady. Kópsatyly tazartý jáne tuzsyzdandyrý protsesinen ótken sý uzyndyǵy 100,7 shaqyrym jańa magıstraldy qubyr arqyly Jańaózen qalasynyń ortalyq sýmen jabdyqtaý torabyna berildi.
Jańa zaýytta QMG basshysy A.Hasenov jáne Mańǵystaý oblysynyń ákimi N.Qılybaı tuşytylǵan teńiz sýynyń dámin tatyp kórdi.
Bıyl qazan aıynyń sońyna deıin zaýyttyń óndiristik qýatyn táýligine 50 000 tekshe metrge deıin arttyrý josparlanyp otyr.
Kásiporynda 30 mamyr kúni qurylys-montajdaý jumystary aıaqtalyp, iske qosý-baptaý is-sharalary júrgizildi. 9 shildede tehnologııalyq jabdyqtardyń búkil tsıkli iske qosylyp, onyń barysynda teńiz sýyn tuşytýǵa arnalǵan óndiristik jeli tekserildi jáne tolyq jýylyp shyqty.
QMG júzege asyrǵan joba 91 jumys ornyn ashýǵa múmkindik beredi. Qurylys jumystaryna 650-ge deıin adam jumyldyrylǵan bolatyn.