Kendirli zaýytynda teńiz sýyn tuşytý protsesi bastaldy
ASTANA. KAZINFORM — Mańǵystaý oblysyndaǵy jobalyq qýaty táýligine 50 myń tekshe metr bolatyn «Kendirli» zaýytynda teńiz sýyn tuşytý protsesi bastaldy.
Kásiporyndaǵy qurylys jumystary 30 mamyr kúni aıaqtalǵan. Sýdy tuşytý, tuzsyzdandyrý jáne mıneraldandyrý tsehtary, sorǵy stantsııasy, eki qosalqy stantsııa, jóndeý-mehanıkalyq tseh, garaj, qoımalar, zerthana, órt sóndirý beketi, qazandyq ornatyldy.
Sonymen qatar ınjenerlik-kommýnıkatsııalyq ınfraqurylym — uzyndyǵy 80,1 km elektr berý jelisi, jalpy uzyndyǵy 201,4 km eki tarmaqty magıstraldy sý qubyry, 48,1 km gaz qubyry, 40,1 km avtojol salynyp bitti. Teńiz túbindegi transheıaǵa polıetılen qubyrlary tóseldi.
Qazirgi kezde zaýytta iske qosý-baptaý is-sharalary júrip jatyr.
Búgin tehnologııalyq jabdyqtardyń búkil tsıkli iske qosyldy, onyń barysynda teńiz sýyn tuşytýǵa arnalǵan óndiristik jeli tekseriledi jáne jýylady. Bul protsess 72 saǵatqa sozylady.
Synaq is-sharalary sátti aıaqtalǵan kezde zaýyt jumys rejımine kóshedi.
Teńiz sýyn tazartý men tuşytý — kúrdeli protsess. Teńiz sýy zaýyttan 730 metr qashyqtyqta, teńiz ústinde ornalasqan arnaıy sý jınaıtyn qurylǵy arqyly tereńdigi 12 metrlik qudyqqa kelip quıylady. Odan keıin qondyrǵylardyń kómegimen qubyr arqyly kásiporynǵa jetedi.
Tuşytý tsehynda sýdy laıdan tazartýǵa jáne basqa zattardy joıýǵa baǵyttalǵan birqatar protsedýra jasalady.
Kelesi qadam – sý avtomattandyrylǵan ózdiginen tazartatyn súzgilerge jiberiledi. Osydan keıin sý ýltra súzgileý protsesinen ótedi. Bul tásil sý quramyndaǵy organıkalyq zattardy 70-75% deıin tómendetýge jáne barlyq qospalardy, sonyń ishinde bakterııalardy, bir jasýshaly baldyrlardy jáne basqa da elementterdi tolyq joıýǵa (100%) yqpal etedi.
Keri osmos tehnologııasy sýdyń quramyn mıneraldy qospalardan tazartyp, 99,5% tuşytýǵa múmkindik beredi. Remıneralızatsııa protsesi tuşy sýdy joǵary sapaǵa jetkizý úshin qajet. Hlorlanǵannan keıin ol aýyz sý rezervýarlaryna jiberiledi.
- Tuşytylǵan teńiz sýy barlyq qajetti taldaý men zerthanalyq zertteýler júrgizilgennen keıin uzyndyǵy 100,7 km qubyr arqyly Jańaózen qalasyna jetkizý úshin «Ózenınvest» memlekettik kommýnaldyq mekemesine jiberiledi. Zaýyt sýdy bastapqy kezde «qosymsha rejımde» tuşytatyn bolady, ıaǵnı qalaǵa jetispeıtin kólemin qamtamasyz etedi.
Jańa zaýyt iske qosylǵannan keıin Jańaózen turǵyndary men irgeles jatqan eldi mekender aýyz sýmen qamtamasyz etiledi. Sondaı-aq nysan «Astrahan — Mańǵyshlaq» magıstraldy sý qubyryna júktemeni azaıtyp, óńirdegi ónerkásip áleýetin damytýǵa yqpal etedi. Sondaı-aq zaýyt 91 jumys ornyn ashýǵa múmkindik beredi, - delingen «QazMunaıGaz» UK habarlamasynda.
Aıta keteıik, iri áleýmettik joba Memleket basshysynyń tapsyrmasy boıynsha iske asyrylyp jatyr. Barlyq eksplýatatsııalyq, sonyń ishinde jabdyqtardy jasaǵan kompanııalardyń qatysýymen ótetin is-sharalar aıaqtalǵannan keıin nysan Mańǵystaý oblysy ákimdiginiń kommýnaldyq menshigine beriledi.
