Kendirli kýrorttyq qalasynyń bas jospary ázirlenip, áýejaıdyń orny belgilendi
AQTAÝ. KAZINFORM – Mańǵystaýda Jańaózen qalasynan 65 shaqyrym jerde, Kaspıı teńiziniń jaǵalaýynda «Kendirli» kýrorttyq qalasy salynady. Memleket basshysynyń tapsyrmasyna sáıkes, 40 myń adamǵa arnalǵan jańa shahardyń bas jospary ázirlendi.
Búginde «Kendirli» jaǵalaýynda jıyrmaǵa jýyq demalys orny jumys isteıdi. Bas josparǵa sáıkes, olardyń qataryn 4 jáne 5 juldyzdy qonaq úıler, shıpajaılar men saýyqtyrý lagerleri tolyqtyrady. Birneshe aılaq salynyp, akvaparkter ashylady. Balyq sharýashylyqtary damymaq. Sonymen qatar halyqaralyq deńgeıdegi sporttyq stadıon, mádenı keshender, turǵyn úıler salynady. Kýrorttyq qala 4 myń gektar aýmaqta ornalasady.
«Kendirli» teńiz jaǵasynda salynatyn barlyq ınvestıtsııalyq jáne ózge de jobalardyń qunyn anyqtaý úshin bıyl týrıstik aımaqtyń egjeı-tegjeıli jospary daıyndalyp jatyr. Bizge berilgen tapsyrma 2025-jyldyń birinshi toqsanyna deıin aıaqtaý bolatyn. Biraq, biz ony kelesi jyl emes, bıyl jyl sońyna deıin aıaqtaýdy josparlap otyrmyz», - deıdi Kendirli aýylynyń ákimi Meken Úısenov.
Prezıdent Joldaýda Kendirli kýrorttyq aımaǵyn damytýdy jedeldetýdi jáne áýejaı salýdy tapsyrǵan bolatyn.
«Búginde áýejaıdyń orny belgilendi. Ol qaladan 14 shaqyrym jerde ornalasatyn bolady. Quzyrly organdar jobanyń tehnıkalyq sharttaryn talqylap jatyrı, - deıdi Kendirli aýylynyń ákimi Meken Úısenov.
Sondaı-aq Jańaózen-Kendirli-Túrikmenstan tas joly qaıta qurylymdalyp, jańartylatyn boldy. Jańadan boı kóteretin Kendirli qalasyn jáne Jańaózen qalasyn aýyz sýmen qamtamasyz etý úshin Kaspıı teńiziniń Toqmaq múıisinde táýligine 50 myń tekshe metr sý óndiretin zaýyttyń qurylysy júrip jatyr.
«Osy jyldyń aıaǵyna deıin qurylys-montaj jumystary aıaqtalady. Sodan keıin keshendi tekserý, iske qosý jumystary kelesi jyldyń mamyr aıyna deıin júrgiziledi. Jańadan salynatyn Kendirli aýylyna sý berý úshin biz 4-qudyqtan arnaıy oryn qaldyryp qoıdyq», - deıdi zaýyt qurylysyna tapsyrys berýshi kompanııanyń ókili Oraq Aıapov.
Buǵan deıin Aqtaýda 1200 oryndyq eki birdeı mekteptiń qoldanysqa berilgenin jazǵan bolatynbyz.
