Kendirlide sý tuşytý zaýyty salynady

AQTAÝ. QazAqparat - Kendirli demalys aımaǵyna sý tuşytý zaýyty salynady. Bul týraly Mańǵystaý oblysynyń ákimi Serikbaı Trumov «QazMunaıGaz» UK» AQ ókilderimen kezdesý kezinde aıtty, dep habarlaıdy QazAqparat tilshisi.

Atalmysh jobanyń tehnıkalyq-ekonomıkalyq negizdemesi osy ýaqytqa deıin tehnıkalyq sý shyǵarý boıynsha daıyndalsa, endi aýyz sýyn tuşytý boıynsha qaıta jandanatyn bolady.

Osyǵan oraı, «Kendirli demalys aımaǵynan qýaty táýligine 45-50 myń tekshe metr bolatyn sý tuşytý zaýytyn salý» jobasy ázirlendi.

Jınalys kezinde taraptar zaýyt pen qubyrlardy ornalastyrýdyń birneshe nusqalaryn ortaǵa saldy.

«Merdiger mekeme «Qazaq munaı jáne gaz ǵylymı-zertteý jáne jobalaý ınstıtýty» AQ jobanyń tehnıkalyq-ekonomıkalyq negizdemesin sáýir aıynyń sońyna deıin ázirleıtinin aıtty. Sodan keıin áleýetti ınvestorlarmen kelissózder júrgizip, zaýyttyń naqty qýatyn anyqtap, qurylys jumystaryn eń qysqa merzimde aıaqtaıtyn bolamyz», - deıdi «QazMunaıGaz» UK» AQ munaı tasymaldaý boıynsha basqarýshy dırektory Nurtas Shmanov.

Eske sala keteıik, osy jyldyń qyrkúıek aıynda QR Premer Mınıstri Asqar Mamınniń tóraǵalyǵymen Jańaózendi damytýdyń keshendi jospary boıynsha jıyn ótken bolatyn. Atalmysh basqosýda Úkimet basshysynyń Jańaózen qalasyndaǵy aýyz sý máselesin sheshý jóninde arnaıy tapsyrma bergen bolatyn.