Ken ornynan alynǵan metall shıkizat eń birinshi qazaqstandyq kásiporyndarǵa jetkiziledi – zań jobasy

ASTANA. QazAqparat – Elimizdegi ken oryndarynan metall ónidirýmen aınalysatyn kásiporyndar óndeýshi ónerkásipterge birinshi kezekte shıkizat jetkizýge mindetteledi. Mundaı usynys Indýstrııa jáne ınfraqurylymdyq damý mınıstrligi ashyq talqyǵa shyǵarǵan «Ónerkásiptik saıasat týraly» QR Zańynda jazylǵan, dep habarlaıdy QazAqparat tilshisi.

«Óńdeýshi ónerkásip kásiporyndaryn otandyq shıkizatpen qamtamasyz etý jónindegi qaǵıdalarǵa sáıkes, Qazaqstan Respýblıkasynyń aýmaǵyndaǵy metall kenderinen óndirilgen shıkizatpen birinshi kezekte óńdeýshi ónerkásip kásiporyndary qamtamasyz etilsin», - dep jazylǵan ózgeris engizilýi múmkin zań jobasynda.

Qujatta jazylǵandaı, shıkizat óndirýshilerge mundaı mindetteme júkteý Memleket basshysynyń eldiń áleýmettik-ekonomıkalyq damý máseleleri jónindegi keńeıtilgen keńes barysynda aıtylǵan tapsyrmasyn oryndaý maqsatynda usynylyp otyr.

«Osyǵan baılanysty, óńdeý ónerkásibi kásiporyndaryn Qazaqstan aýmaǵynda óndirilgen kennen óndirilgen bastapqy metaldarmen qamtamasyz etý jónindegi mindettemelerdi engizý usynylady. Bul túzetý óńdeý ónerkásibi kásiporyndaryn shıkizatpen tolyq qamtamasyz etýge múmkindik beredi», - dep túsindirme berilgen ózgeriske.

Zań jobasy 21 shildege deıin kópshilik talqylaýda bolady.