Ken ornyn paıdalanýshylarǵa qatysty ekologııalyq jaýapkershilikti kúsheıtetin zań jobasy Úkimetke engizildi - N. Áshimov
ASTANA. 19 qarasha. QazAqparat /Rýslan Ǵabbasov/ - Elimizde budan bylaı ekologııalyq zańnama talaptaryn oryndamaǵan munaı-gaz kompanııalaryna qatysty jaýapkershilik kúsheıtiletin bolady.
Bul týraly búgin Qorshaǵan ortany qorǵaý mınıstrliginiń alqa májilisinde atalǵan vedomstvonyń basshysy Nurǵalı Áshimov málim etti.
Mınıstr Memleket basshysynyń tapsyrmasy boıynsha elimizdiń ekologııalyq qaýipsizdigi turǵysyndaǵy qadaǵalaý kúsheıtilgenin aıta kele: «Biz Úkimetke ekologııalyq jaýapkershilikti qataıtýǵa qatysty zań jobasyn engizdik. Atap aıtqanda, Qylmystyq kodekske ózgertý engiziletin bolady. Eger de Qazaqstan tabıǵatyna keltirilgen zalal 130 mln. teńgeden asyp túsetin bolsa, onda qylmystyq jaýapkershilikke tartý máselesi qozǵalady. Osyny qaperlerińizde ustaǵan jón»,- dedi.
Ol bul sektordaǵy qandaı da bir kompanııalarǵa jeńildikter jasalmaıtynyn eskertip ótti. Mınıstrdiń sózine qaraǵanda, Parlament talqylaýyna atalǵan zań jobasyn bıyl engizý josparlanyp otyr. «Mınıstrlik zańgerlik jumystardy kúsheıtý nusqaýlaryn aldy. Zańgerler qorshaǵan ortany qorǵaý baǵdarlamasynyń oryndalmaýy saldary memleketke zııan keltiretinin barynsha dáleldeýge tyrysady jáne aıyptylar jazasyn alady»,- dedi N. Áshimov.
Іri kompanııalar úshin 130 mln. teńgeni tóleı salý qatty aýyrpalyq emes ekenine toqtalǵan mınıstr, sondyqtan da ekologııalyq jaýapkershilikti kúsheıtý mańyzdy ekenin jetkizdi.
