Ken óndirý salasyndaǵy eń joǵary jalaqy qandaı
NUR-SULTAN. QazAqparat - Qazaqstanda eń joǵary eńbekaqynyń kólemi anyqtaldy. Energyprom.kz zertteýine qaraǵanda, ken óndirý salasyndaǵy jumysshylar ortasha eseppen 400 myń teńge jalaqy alady, dep habarlaıdy QazAqparat tilshisi.
«2019 jyldyń birinshi toqsanynda ónerkásip salasy jumysshylarynyń ortasha aılyq nomınaldy eńbekaqysy 243,8 myń teńgeni qurap, bir jylda 9,2 paıyzǵa ósti. Inflıatsııany eskere otyryp, sektordaǵy eńbekaqy boıynsha satyp alý qabilettigi 4 paıyzǵa joǵarylady. Eń joǵary jalaqy ken óndirý salasynyń adamdaryna tıesili. Osy segmenttegi qyzmetkerler ortasha eseppen 401,1 myń teńge alady. Naqty ósim 4,3 paıyzdy qurady», - delingen taratylǵan málimette.
Óńdeýshi sektordaǵy ortasha statıstıkalyq jumysshynyń eńbekaqysy aıtarlyqtaı tómen, ıaǵnı 189,2 myń teńgeni qurady. Elektr energııasymen qamtý salasynyń jumysshylaryna ortasha eseppen 157,4 myń teńge, sýmen qamtamasyz etý mamandaryna 118,1 myń teńge jalaqy tıesili.
Ken óndirý salasynda eń joǵary ortasha aılyq nomınaldy jalaqyny shıki munaı men tabıǵı gaz óndirý salasyndaǵy mamandar alady. Bul baǵytta eńbekaqy somasy 785,2 myń teńgege jetip, osy kórsetkish ortasha respýblıkalyq (168,5 myń teńge) deńgeıden 4,7 esege, al ónerkásip jumysshylarynyń (243,8 myń teńge) ortasha aılyǵynan 3,2 esege artyq boldy.
Ekinshi orynǵa taý-ken óndirý ónerkásibi salasyndaǵy tehnıkalyq qyzmetter shyqty, bul baǵytta qyzmet etetinderdiń eńbekaqysy 421,9 myń teńge boldy. Kósh bastap turǵandardyń úshtigine kómir men lıgnıt óndirý segmenti enip, osy saladaǵy jalaqy 281,4 myń teńge shamasynda qalyptasty.
Taý-ken óndirý men karerlerdi ıgerý salasyndaǵy eń joǵary eńbekaqy Batys Qazaqstan oblysynda baıqaldy. Osy óńirde 2019 jyldyń birinshi toqsanynda ortasha aılyq nomınaldy eńbekaqy 1,2 mln teńgege (bir jylda 11,7 paıyzǵa ósti) jetti.
Ekinshi orynda Nur-Sultan qalasy turaqtady, bul turǵyda ken óndirý salasynyń qyzmetkerlerine ortasha eseppen 1,1 mln teńge tólenedi. Jyldyq ósim 8,1 paıyz boldy. Osy úshtikke Atyraý oblysy kirip otyr, bul sektordaǵy jalaqy 920,0 myń teńgeni qurap, bir jyl burynǵy deńgeıden 14,3 paıyzǵa artyq.
«Sektordaǵy eńbekaqynyń jyldyq eń joǵary ósimi Jambyl oblysynda tirkeldi. Atap aıtqanda, 34,2 paıyzǵa artyp, 185 myń teńgege deıin jetti», - delingen zertteý málimetinde.
