Ken óndiretin kásiporyn eń aldymen jergilikti halyqtyń pikirine qulaq asýy tıis - mınıstr

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev Aqmola oblysynda ýran men altyn óndirisi boıynsha jańa ken oryndaryn ıgerýge qatysty pikir bildirdi, dep habarlaıdy QazAqparat tilshisi.

OKQ-da ótken onlaın baspasóz máslıhaty barysynda mınıstrge Aqmola oblysynyń Aqsý jáne Kvartsıtka aýylynda ýran men altyn óndiretin jańa ken oryndaryn ıgerý máselesine qatysty suraq qoıyldy.

Bul jumysty «Altyn Almaz» kompanııasy júrgizbek. Atalyp ótkendeı, ol jerlerde ýran men altyndy ashyq ádispen óndirý kózdelgen.

Ol úshin jergilikti jurt basqa jaqqa kóshýi tıis bolǵandyqtan halyq tarapynan narazylyq týyndaǵan.

«Kez kelgen óndiris oshaǵyn keńeıtý nemese jańa óndiris oshaǵyn ashý úshin aldymen qoǵamdyq tyńdaý ótýi tıis. Sol qoǵamdyq tyńdaý kezinde kompanııa zamanǵa saı úzdik tehnologııalardy qoldanatyny dáleldense, qorshaǵan ortaǵa jaǵymsyz saldary az ekeni belgili bolsa, halyq onymen kelisse – tek osyndaı kezde ǵana mınıstrlik ol óndiristi qoldaı alady», - dedi Maǵzum Myrzaǵalıev.