Ken-metallýrgııalyq sektor jumys oryndaryn saqtaıdy
ASTANA. QazAqparat - Búgingi tańdaǵy eń mańyzdy mindettiń biri - jumys oryndaryn saqtaý, jumysshylardyń jalaqysynyń kólemin qysqartpaý,- dep málimdedi Astanadaǵy baspasóz máslıhatynda Qazaqstandaǵy ken-metallýrgııalyq kásiporyndar qaýymdastyǵynyń (QKMKQ) atqarýshy dırektory Nıkolaı Radostovets.
Ol teńgeniń erkin aıyrbas baǵamyna kóshýiniń ken-metallýrgııa sektoryna qalaı áser etkenine mysal keltirdi. Máselen, áýelde jumysshylarynyń jalaqysyn 25 paıyzǵa qysqartýǵa sheshim qabyldaǵan «Arselor Mıttal Temirtaý» kompanııasy bastapqydaǵy oıynan bas tartyp, jalaqy kólemin burynǵysha qaldyrǵan.
Atqarýshy dırektor «Ken-metallýrgııalyq kásiporyndardyń jumysshylary erteńgi kúni jalaqysyn ósirýdi ótinse, kelisesizder me?» degen saýalǵa: «Árbir eńbek ujymynda jalaqy máselesi ákimshilik, jumysshylar jáne kásipodaqtyń kelissózderi nátıjesinde sheshilýi kerek. Eger kásiporyn ekonomıkasy qarqyndy damıtyn bolsa, keıbir kompanııalar jalaqyny ósirýi múmkin, al shyǵynnan kóz ashpaǵan kompanııada ondaı áńgime qozǵalmaıtyny anyq»,- dep jaýap berdi. Onyń aıtýynsha, ken-metallýrgııalyq sektordaǵy ónimderin eksportqa shyǵaratyn kásiporyndar aqshalaı túsimdi shetel valıýtasymen alady. Alaıda, olar valıýtamen baılanysty kóp taýardy satyp alatyndyqtan, utylady. Sol sebepten árbir kásiporyn óz qarajatyn únemmen jumsaýǵa umtylady. Únemdilik bar jerde, jalaqy burynǵy qalpynda saqtalady.
Atalǵan qaýymdastyq basshysy áleýetti ınvestorlardy tartýǵa qatysty elimizde birqatar ozyq bastamalar men izgi sharalar pisip jetilgenine toqtaldy. Olar ásirese, eńbek qatynastary salasynda kórinis berýde. N. Radostovetstiń aıtýynsha, elimizdegi Eńbek kodeksi jumys berýshilerge mindetine salaq qaraıtyn jumyskerlerden qutylýǵa múmkindik bermeıtin-di, olardy sot arqyly qaıtadan jumysyna ornalastyrýǵa májbúr bolyp keldik. Alaıda, mundaı ustanym naryqtyq talaptarǵa saı kelmedi. Al, bıylǵy kúzde Májiliske usynylatyn jańa kodekste osy másele sheshimin tapqan. Sonyń biri - jumys berýshi boıkúıez jumysshyny kásipodaqtyń kelisiminsiz-aq jumystan shyǵara alady.
Ol sondaı-aq, teńgeniń erkin aıyrbas baǵamyna kóshýi nátıjesinde otandyq ónimder arzandaı bastaıtynyn málim etti. Bul jerde bizge Eýrazııalyq ekonomıkalyq odaqtaǵy áriptesimiz - Reseıdiń tájirıbesin eskerý mańyzdy. «Óıtkeni, reseılikter rýbldiń baǵamy erkin aıyrbasqa jiberý arqyly ózindik qundy túsirip, sonyń nátıjesinde álemdik naryqtardaǵy óz taýaryna básekelestikke saı suranys týǵyza bildi. ıAǵnı, olardyń ónimderiniń ózindik quny barynsha básekege qabiletti bolýda. Ótken jyly reseılik taýarlar Qazaqstanǵa aǵyldy. Sondyqtan, óndiristi damytýǵa nıettengen ınvestorlar teńgeniń erkin aıyrbasqa kóshýin qýana qabyldady. Aldaǵy ýaqytta olardyń Qazaqstanǵa degen qyzýǵýshylyǵy arta túsedi»,- dedi N. Radostovets.
Ámirlan Álimjan
