Ken qazýǵa ruqsat alý úshin qoǵamdyq tyńdaý ótkizý talaby joıylýy múmkin — vıtse-mınıstr
ASTANA. KAZINFORM — Májilis depýtaty Temir Qyryqbaev ken qazýǵa ruqsat alý úshin jergilikti turǵyndarmen qoǵamdyq tyńdaý ótkizý talabyn Ekologııa kodeksinen alyp tastaýdy usyndy.
— Paıdaly qazbalardy jergilikti aýyl turǵyndary eshbir lıtsenzııa almaı-aq qazyp jatqan jaıttar kóbeıip keledi. Bizge sondaı shaǵymdar túsip jatyr. Al zańǵa baǵynatyn kásipkerler jerdi aýktsıonnan alyp, lıtsenzııasyn rásimdep, Ekologııa mınıstrliginiń ruqsatyn alyp, salyq tóleýshi retinde kompanııasyn sol jerge tirkeıdi. Eń sońynda qoǵamdyq tyńdaý ótkizgen kezde jer qoınaýyn zańsyz ıgerip júrgenderdiń ókilderi 50-60 adam bolyp kelip, kezdesýdiń shyrqyn buzady. Osylaısha bárin zańdy rásimdegen kásipkerler qaıtyp ketip jatyr. 3-4 jyldan beri osyndaı problema paıda boldy. Osyǵan baılanysty Ekologııa kodeksiniń 96-babynan qoǵamdyq tyńdaýdy alyp tastap, ruqsat berý sheshimin jergilikti ýákiletti organǵa berýdi usynǵanmyn. Soǵan Ekologııa mınıstrligi men sizdiń ustanymyńyzdy bilgim keledi, — dedi depýtat.
Vıtse-mınıstr ol usynysty qoldaıtynyn ashyp aıtty.
— Óte mańyzdy máseleni kóterip otyrsyz. Ózińiz aıtqandaı, qoǵamdyq tyńdaý ekologııalyq baǵyttan ekonomıkalyq baǵytqa oıysyp ketti. Ol durys emes, meniń oıymsha, bizdiń ustanymymyz sol. Biz siz aıtqan normany Ekologııa mınıstrligimen birge jetildirýge daıynbyz. Biraq men tanystyryp turǵan zań jobasynyń tujyrymdamasy sáıkes kelmeıdi degen qısynmen qarastyrǵan joqpyz. Kelesi jyly ózgeristerdiń ekinshi paketi bolady. Sol kezde sizben birge osy normany qosýǵa daıynbyz, — dedi mınıstrdiń orynbasary.
Buǵan deıin jyl basynan beri jer qoınaýyn paıdalanýshylarmen 17 kelisimshart buzylǵanyn jazǵan edik.