«Keń dala» jáne «Keń dala 2» baǵdarlamasy: Syr óńirindegi dıqandarǵa qoldaý
QYZYLORDA. KAZINFORM — Qyzylorda oblysynda kúrish jınaý naýqany qarqyndy júrip jatyr. Ónimdiliktiń artýyna dıqandardyń eńbegi men jańa tehnologııalar yqpal etse, ony turaqty etý úshin kóktemgi egis pen egin jınaý jumystary «Keń dala» jáne «Keń dala 2» baǵdarlamalary arqyly jeńildetilgen 5 paıyzben qarjylandyrylyp otyr.
2024 jyldan beri «Keń dala» baǵdarlamasy boıynsha nesıe alýshylarǵa «Damý» kásipkerlikti damytý qorynyń kepildigi usynylyp keledi. Qor qaryz somasynyń 85 paıyzyna deıin kepildendiredi. Al sharýa qaryz somasynyń 15 paıyzyna ǵana jeke múligin kepildikke qoıady.
Bıyl Syr óńirinde 25 jyldan astam ýaqyt boıy kúrish egýmen aınalysyp kele jatqan «Er-Áli» sharýa qojalyǵy «Keń Dala 2» baǵdarlamasyn alǵash ret qoldandy. Kásipker Álibı Bekjanov baǵdarlamanyń tıimdiligin tilge tıek etti.
— Bıyl biz Agrarlyq nesıe korporatsııasynan 5%-ben óte tıimdi nesıe aldyq. Nesıe somasynyń 15 paıyzyna óz tarapymyzdan kepildik qoıdyq, al qalǵan 85 paıyzyn «Damý» qory qamtamasyz etti. ıAǵnı, bizge kepil boldy. Biz 1800 gektarǵa kúrish egemiz. Jalpy bıyl orta eseppen gektaryna 80 tsentnerden ónim alamyz dep josparlap otyrmyz. Budan bólek mal azyǵyn da daıyndaımyz. 800 gektar jońyshqa egetin alqabymyz da bar.
«Shaǵan jer» JShS-niń tájirıbesi de qarjylandyrýdyń tıimdiligin aıqyn kórsetedi. Agrarlyq nesıe korporatsııasynyń «Keń dala 2» baǵdarlamasy aıasynda jeńildetilgen nesıe alǵan seriktestik bıylǵy maýsymda 2900 gektarǵa kúrish ekken. Bul sharýashylyqtyń dıqandary da ár gektardan 80 tsentner ónim jınaýdy josparlap otyr.
— Alynǵan qarajat janar-jaǵarmaı, tyńaıtqysh, tehnıka bólshekterin satyp alýǵa, sondaı-aq sýdyń ótemaqysy sııaqty shyǵyndarǵa jumsaldy. Qazir sharýashylyqtyń egis alqabyna 9 kombaın jáne basqa da tehnıkalar jumyldyryldy, — deıdi «Shaǵan jer» JShS basshysynyń keńesshisi Ábdikárim Serikbaev.
Agrarlyq nesıe korporatsııasynyń Qyzylorda oblysyndaǵy fılıalyna 2025 jylǵy kóktemgi egis jáne egin jınaý jumystaryn qarjylandyrý úshin 13,5 mlrd teńge bólingen. Onyń 7 mlrd teńgeden astamy 94 sharýashylyqqa nesıe retinde berilip, 43 myń gektardan astam jerge egin egilgen.
2026 jyldyń kóktemgi egin egý naýqanyn erte qarjylandyrý maqsatynda «Keń Dala» jáne «Keń Dala 2» baǵdarlamalary boıynsha ótinimder jyl sońynda qabyldana bastaıdy. Jeńildetilgen nesıe sharýalardyń egis naýqanyna ýaqytyly daıyndalýlaryna, ónimdilikti arttyrýlaryna múmkindik beredi.